Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 635 Hüküm no: 673 Orijinal metin no: [103a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Hasan’ın kendisini dövüp yaraladığı iddiasıyla damadı Sefer Bey b. Abdullah aleyhine açtığı davada üç bin akçe üzerine sulh olduğu Hasköy kasabası mahallâtından Câmi‘-i atîk mahallesinde sâkine Fâtıma bt. Hasan nâm hâtun mahmiye-i mezbûrede mahfil-i kazâda damadı işbu râfi‘ü’l-kitâb Sefer Bey b. Abdullah mahzarında ikrâr ve takrîr-i kelâm edip bundan akdem damadım mezbûr Sefer Bey söğüt ta‘bîr olunur ağaç ile sol kolumun bileğini darb ve kesr ve cerh edip menfa‘ati bi’l-külliyye izâle eylemiştir deyu yedimde olan hüccet-i şer‘iyye fehvâsınca mûcib-i şer‘îsi mezbûr Sefer Bey’den taleb ve da‘vâ eylediğimde beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip zikrolunan darb ve kesr da‘vâsından ve ondan nâşî mûcib-i şer‘îsinden mezbûr Sefer Bey ile beni üç bin akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr üç bin akçemi yedinden bi’t-tamâm alıp kabz eyledikden sonra husûs-ı mezbûra müte‘allik cemî‘ de‘âvî ve mutâlebâtdan ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm husûs-ı mezbûra müte‘allik benden veya vekîlimden da‘vâ ve nizâ‘ sudûr ve zuhûr eder ise lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Şühûdü’l-hâl: Musa Çavuş b. Mehmed el-mübâşir, Mustafa Çavuş b. Mehmed, Mehmed Bey b. ( ), Zülfikar Bey, el-Hâc Yusuf tâbi‘-i mukābeleci.