Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 636 Hüküm no: 674 Orijinal metin no: [103a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Arnavud Mehmed’in eşyalarını çaldığını iddia ettiği Mustafa Beşe b. Ebubekir’in zimmetini ibra ettiği Vilâyet-i Rumeli’nde Şumnu kazâsına tâbi‘ Podavya nâm karye sükkânından Mehmed Bey b. Arnavud Mehmed nâm cündi mahmiye-i Edirne’de mahfil-i kazâda râfi‘ü’l-kitâb Mustafa Beşe b. Ebîbekir mahzarında ikrâr edip târih-i kitâbdan on beş gün mukaddem mahmiye-i mezbûrede Tarakçılar Hanı’nda müsâferet tarîkiyle sâkin olduğum odanın kilidi kırılıp içinden otuz guruş kıymetli bir gümüşlü kılıcım ve on guruş kıymetli iki tabancalı tüfengim ve iki yüz akçe kıymetli bir don ve gömleğim ve işbu mevcûd bi’l-meclis bir çift eldivenim ahz ve serika olunmuşidi hâlâ eşyâ-i mezbûrdan zikrolunan bir çift eldivenim mezbûr Mustafa Beşe yedinde bulup kendi mülküm olduğunu huzûr-ı hâkimü’ş-şer‘de muvâcehesinde vech-i şer‘î üzere isbât edip kabz eylemişidim lâkin bâkī olup bâlâda mezkûr olan eşyâyı dahi sen ahz eyledin deyu mezbûr Mustafa Beşe’den da‘vâ ve taleb edip ol dahi inkâr etmişidi hâlâ eşyâ-yi mezbûre da‘vâsından mezbûr Mustafa Beşe’yi ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d da‘vâ ve nizâ‘ım yokdur sudûr dahi ederse mesmû‘a olmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Recebi’l-ferd li-sene semân ve sittîn ve elf. Şühûdü’l-hâl: İbrahim Bey b. Ömer, Hüseyin Bey b. Veli, Mustafa Çelebi b. Abdullah, Mehmed Çavuş el-mübâşir, Mustafa b. Hüseyin, Veli b. Ömer, Yunus Beşe b. Abdullah, Hasan Beşe b. Abdullah.