Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 636 Hüküm no: 675 Orijinal metin no: [103b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar nahiyesine bağlı Pınarca köyünden bazı zimmilerin ölen Hıristo v. Yuvan’a olan tahıl borçlarını varisi ve oğlu Dimo’ya ödemeyi taahhüt ettikleri Mahmiye-i Edirne muzâfâtından Üsküdar nâhiyesine tâbi‘ Pınarca nâm karye ahâlîsinden Manol v. Kirko ve Petko v. Diço ve Dimo v. Yano ve Kalo v. Kirko ve Dimo v. Kiro ve Dimitri v. Todori ve Kuka v. Maso ve Miço v. Maso nâm zimmîler mahmiye-i mezbûrede mahfil-i kazâda karye-i mezbûre sükkânından iken bundan akdem hâlik olan Hıristo v. Yuvan nâm zimmînin sulbî oğlu Dimo nâm sagīrin tesviye-i umûruna kıbel-i şer‘den mansûb vasî olan ammi İstoyko nâm zimmî muvâcehesinde herbiri ikrâr ve takrîr-i kelâm edip sagīr-i mezbûra babası hâlik-i merkūmdan irs-i şer‘le intikāl eden malından otuz keyl buğdayını ahz ve istihlâk edip ve işbu hâzır bi’l-meclis Mehmed Bey b. Abdullah dahi on keyl buğday ve üç keyl arpa ve iki keyl çavdarını tarlasından biçip ahz ve istihlâk etmişidi hâlâ bize mislini vermesi lâzım olan otuz üç keyl buğday ile mezbûr Mehmed Bey’e misli lâzım gelen on keyl buğday ve üç keyl arpa ve iki keyl çavdarı karyemizde vasiyy-i merkūm İstoyko’ya edâ ve teslîm etmeğe ta‘ahhüd eyledik dediklerinde mâ-vaka‘a bi’t-taleb ketb olundu. Fî gurreti Recebi’l-ferd li-sene semân ve sittîn ve elf. Şühûdü’l-hâl: Hasan Çavuş el-mübâşir, Mustafa Çavuş b. Abdullah, Mustafa b. Hüseyin, İbrahim b. Ömer.