Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 637 Hüküm no: 676 Orijinal metin no: [103b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Câbi Mehmed Bey b. Abdullah’ın babasına sattığı bağ ve eşya bedelinden alacağı olduğu iddiasıyla Dimo v. Hıristo aleyhine açtığı davadan vazgeçtiği Mahmiye-i Edirne muzâfâtından Üsküdar nâhiyesine tâbi‘ Pınarca nâm karye sükkânından Câbî Mehmed Bey b. Abdullah nâm kimesne mahmiye-i mezbûrede mahfil-i kazâda karye-i mezbûre sükkânından iken bundan akdem hâlik olan Hıristo v. Yuvan nâm zimmînin sulbî oğlu Dimo nâm sagīrin tesviye-i umûruna kıbel-i şer‘den mansûb vasî olan ammi işbu râfi‘ü’l-kitâb İstoyko v. Yuvan nâm zimmî muvâcehesinde ikrâr ve takrîr-i kelâm edip târih-i kitâbdan ( ) sene mukaddem karye-i mezbûrede vâki‘ bir tarafdan Kiko v. Yani bağı ve bir tarafdan Marti nâm zimmî bağı ve bir tarafdan Peltek Niko nâm zimmî bağı ve bir tarafdan tarîk-ı âm ile mahdûd iki dönüm bir kıt‘a bağımı hâlik-i merkūma hâl-i hayâtında iki bin dört yüz akçeye ve bir arabamı sekiz yüz akçeye ve bir kebeyi dört yüz akçeye cem‘an üç bin altı yüz akçeye bâtten bey‘ ve teslîm ol dahi iştirâ ve tesellüm eyledikden sonra kable’l-îfâ hâlik olup semen-i mezkûr zimmetinde kalmışidi ona binâen bağ-ı mezkûra vaz‘-ı yed ve muhallefâtından olup sagīr-i mezbûra intikāl eden karye-i mezbûrede vâki‘ lede’l-cîrân ma‘lûmü’l-hudûd ev yerinden beş yüz akçe kıymetli bir çatma odayı yerinden ref‘ ve ahz eylediğimden sonra semen-i mezbûrun bâkīsini dahi vasiyy-i mezbûr İstoyko’dan vesâyeti hasebiyle da‘vâ ve taleb eylediğimde ol dahi zikrolunan bağı ve arabayı ve kebeyi hâlik-i mezbûra bey‘ eylediğimi inkâr etmişidi hâlâ da‘vâ-yı mezbûreden fâriğ olup bağ-ı mezkûrdan kasr-ı yed ve mârrü’z-zikr çatma odayı yine yerine vaz‘ ve vasiyy-i mezbûra teslîme ta‘ahhüd eyleyip zikrolunan bağ ve araba ve kebe semenlerine müte‘allik da‘vâdan sagīr-i mezbûru ibrâ-i âm ile ibrâ ve ıskāt eyledim ba‘de’l-yevm husûs-ı mezbûra müte‘allik sagīr-i mezbûr ile vechen mine’l-vücûh da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî gurreti Recebi’l-ferd li-sene semân ve sittîn ve elf. Şühûdü’l-hâl: es-Sâbıkūn.