Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 641 Hüküm no: 680 Orijinal metin no: [104a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsa Bey b. İbrahim’in Dolo v. Manol aleyhine açtığı alacak davasında taraflara yemin ettirilip anlaşmazlığa son verildiği Mahmiye-i Edirne’de ( ) mahallesinde sâkin İsa Bey b. İbrahim nâm kimesne mahmiye-i mezbûrede mahfil-i kazâda mahmiye-i mezbûre muzâfâtından Bosnaköyü nâm karyede sâkin Dolo v. Manol nâm zimmî muvâcehesinde üzerine takrîr-i da‘vâ edip târih-i kitâbdan altı sene mukaddem mezbûra bin iki yüz akçe ikrâz ve teslîm ol dahi istikrâz ve kabz eyledikden sonra meblağ-ı mezbûrdan bir def‘a yüz elli akçe ve bir def‘a otuz akçe kıymetli bir çit saman ve hâlâ beş yüz yirmi akçeyi dahi kabz edip bâkī beş yüz akçeyi mezbûr Dolo’dan taleb ederin suâl olunsun dedikde gıbbe’s-suâl mezbûr Dolo cevâbında müdde‘î-i mezbûrdan ancak yedi yüz akçe istikrâz ve kabz edip yine meblağ-ı mezbûr yedi yüz akçeyi i‘tirâfı üzere def‘ ve teslîm eylediğimden mâ‘adâ altı sene üzerime ilzâm-ı ribh olunmuş müvekkil ile iki bin üç yüz akçe dahi def‘ ve teslîm eyledim deyu def‘le mukābile edicek evvelâ müdde‘î-i mezbûrdan ziyâdeyi mübeyyine beyyine taleb olundukda ve sâniyyen mezbûr Dolo’dan sıdk-ı makāline beyyine taleb olundukda herbiri ityân-ı beyyineden âciz olup istihlâf etmeğin mezbûr Dolo’ya müdde‘î-i mezbûrdan kabzına i‘tirâf eylediği yedi yüz akçeden ziyâde istikrâz ve kabz etmeyip hâlâ kıbelinde müdde‘î-i mezbûrun hakkı olmadığına yemîn teklîf olundukda ol dahi hasbe’l-mes’ûl yemîn billâhi’l-lezî enzele’l-İncîle alâ İsa (a.s.) ettikden sonra müdde‘î-i mezbûra merkūm Dolo’dan kabzına i‘tirâf eylediği yedi yüz akçeden ziyâde ribh nâmına bir akçe almadığına yemîn teklîf olundukda ol dahi yemîn billâhi te‘âlâ etmeğin herbiri âhara mu‘ârazadan men‘ olunup mâ-vaka‘a bi’t-taleb ketb olundu. Şühûdü’l-hâl: Osman Çavuş b. Mehmed el-mübâşir, İbrahim Bey b. Ömer, el-Hâc Ca‘fer b. ( ), el-Hâc Hüseyin b. Memi el-cündi.