Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 648 Hüküm no: 685 Orijinal metin no: [105b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Mahmud’un tasarrufunda bulunan Ortaköy’deki arsası vakıf mülk bahçesini Karakaş Avraham v. Mosi’ye bin guruşa sattığı Vesîkatü nâib el-fakīr Mustafa el-Kādî bi-medîneti Edirne el-mahmiyye Mâ fîh mine’t-takrîr harrerehü’l-fakīru Osman [b.] Ömer el-mevâlî bi-niyâbeti medîneti Edirne ufiye anh. [mühür] Tıbku aslihi’l-mahtûm Ketebehü’l-fakīr Mehmed el-me’mûr bi-istimâ‘i’l-umûri’ş-şer‘iyyeti’l-askeriyye ufiye anh. Bu hüccet Edirne’de nâibü’ş-şer‘i’ş-şerîf Osman Efendi’nin imzâsıyla olan sûretden kayd olunmuşdur. Sah. Mahmiye-i Galata muzâfâtından Ortaköy nâm karyede sâkin Hüseyin Ağa b. Mahmud nâm kimesne meclis-i şer‘-i hatîr-i lâzimü’t-tevkīrde Kedüz cemâ‘atinden işbu bâ‘isü’s-sifr Karakaş Avraham v. Mosi nâm Yahudi muvâcehesinde bi’t-tav‘ ikrâr ve takrîr-i kelâm edip karye-i mezbûrede vâki‘ bir tarafı Baltacı Mahmud Ağa mülkü ve bir tarafı yine kendi mülküm ve bir tarafı Leya nâm Yahudi mülkü ve taraf-ı râbi‘i tarîk-ı âm ile mahdûd beher sene merhûm ve mağfûrun-[leh] Sultân Bayezid Evkāfı’na kırk akçe mukāta‘ası olup tûlen ve arzan bin sekiz yüz kırk dört zirâ‘ be-hesâb-ı şatrancî arsalar eşcâr-ı müsmire ve gayr-ı müsmiremi hâvî ve müştemil mülk bahçemi bi-cümleti’t-tevâbi‘ ve’l-levâhık mezbûr Karakaş Avraham’a bin kıt‘a kâmilü’l-ayâr guruşa bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzere iştirâ ve kabûl semen-i mezbûr guruşu müşterî-i mezbûr Avraham yedinden tamâm alıp kabz edip semen-i mezbûr ki bin kıt‘a guruş ba‘de’l-yevm mârrü’z-zikr bahçe mülk-i müşterâsıdır keyfe mâ yeşâ ve yahtâr mutasarrıf ola dedikde mukırr-ı mezbûrun minvâl-i muharrer üzere cârî olan ikrârı el-mukarru lehü’l-mezbûr vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu yed-i talibine def‘ olundu. Tahrîren fi’l-yevmi’s-sânî aşer min şehri Rebî‘i’l-evvel li-sene semân ve sittîn ve elf. Şühûdü’l-hâl: Mehmed Çavuş b. İbrahim, Hasan Ağa b. Yusuf, Hüseyin Ağa b. ( ) el-imâm, Hüseyin b. Abdullah el-bevvâbü’s-sultânî, Hüseyin Çavuş, diğer Hüseyin Çavuş, Hasan Çavuş, Mehmed Çavuş b. Osman, Osman Çavuş b. Ahmed, Ali Çavuş b. Rıdvan es-sâkin bi-kasabati Kasımpaşa, Ebûbekir b. Ömer odabaşı, İbrahim Beşe b. Ahmed vekîl-i harc, Abdi Beş eb. Hasan el-kâtib ve gayruhüm.