Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 649 Hüküm no: 686 Orijinal metin no: [106a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miço v. Radovine’nin alacak davasında Mehmed Bey b. Mehmed ile beş yüz akçe üzerine sulh olduğu Mahmiye-i Edirne’ye tâbi‘ Derbend nâm karye sâkinlerinden Miço v. Radovine nâm zimmî meclis-i şer‘-i hatîr-i lâzimü’t-tevkīrde mahrûse-i İstanbul kurbünde Üsküdar sâkinlerinden işbu bâ‘isü’l-kitâb Mehmed Bey b. Mehmed nâm cündi mahzarında ikrâr-ı tâm ve takrîr-i kelâm edip mezbûr Mehmed Bey bundan akdem medyûnu olan Miho nâm zimmîye sen kefîlsin deyu bi-gayri şer‘î benden dört bin altı yüz nakid akçe ve her re’se ikişer yüz akçe kıymeti olan on yedi re’s hınzırım alıp hâlâ meblağ-ı mezbûru ve zikrolunan hınzır kıymetini mezbûr Mehmed Bey’den taleb ve da‘vâ edip beynimizde münâza‘ât-ı kesîre ve muhâsamât-ı şedîde cereyânından sonra beynimize muslihûn tavassut edip da‘vâ-yı mezbûremden beni beş yüz akçe üzerine inşâ-i akd-i sulh edip ben dahi sulh-ı mezbûru kabûl ve bedeli olan meblağ-ı mezbûr beş yüz akçeyi mezbûr Mehmed Bey yedinden bi’t-tamâm alıp kabz edip mâ‘adâsı mutâlebesinden mezbûr Mehmed Bey’in zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Recebi’l-ferd li-sene semân ve sittîn ve elf. Şühûdü’l-hâl: Ali Bey b. el-Hâc Hüseyin, Dilaver b. Perviz, İbrahim b. Mustafa, Fahrü’l-cüyûş Hüseyin Çavuş, Muharriru’l-hurûf Hasan.