Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 650 Hüküm no: 688 Orijinal metin no: [106a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Raziye bt. Bayram’ın terekesi hususunda varislerinden Kaya b. Ali’nin merhumun torunu Kadri b. Musa ile iki bin akçe üzerine sulh olduğu Mahmiye-i Edirne muzâfâtından Kuruçeşme mahallesi sâkinlerinden Kaya b. Ali nâm kimesne meclis-i şer‘-i şerîf-i vâcibü’t-tekrîmde yine mahmiye-i mezbûreye tâbi‘ Bezirci Hâtun mahallesinde sâkin işbu sâhibü’l-kitâb Kadri b. Musa mahzarında bi’t-tav‘i’s-sâf ikrâr ve i‘tirâf edip bundan esbak fevt olan Râziye bt. Bayram nâm hâtunun mezbûr Kadri sadrî kızı Fâtıma’nın oğlu olup hasrân vârisi olmak zu‘muyla muhallefât-ı müteveffât-i mezbûreye vaz‘-ı yed etmiş idi ben dahi mezbûre Râziye’nin zî-rahm cihetinden mezbûr Kadri ile derecede müsâvî vârisi olduğum ecilden muhallefât-ı mezbûreden mahalle-i mezkûrede vâki‘ üç bin akçe kıymetli beyne’l-ahâlî ma‘lûmü’l-hudûd bir mülk menzilden hisse-i şâyi‘amı ve sâir terekeden bana isâbet eden hakkımı da‘vâ ve taleb edip isbât sadedinde iken beynimize Müslimûn-ı muslihûn tavassut edip beni menzil-i mezbûr ve sâir tereke da‘vâsından iki bin akçe üzerine sulh ettiklerinde ben dahi sulh-ı mezbûru kabûl ve bedel-i sulh olan iki bin akçeyi meclis-i sulhda alıp kabz edip mezbûr Kadri’nin muhallefât-ı mezkûreden zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. 25 min [Rece]b sene 1068. Şühûdü’l-hâl: El-hâc Mustafa b. Ali, Mustafa Ağa kethüdâ-yı bâb, Ahmed Çavuş b. Ali, el-Hâc Ahmed, el-Hâc Süleyman, el-Hâc Kurd, Abdi Efendi b. İbrahim, Osman Çelebi, Ahmed Ağa b. el-Hâc Ali, Osman Beşe b. el-Hâc Veli, Mustafa b. Halil, Veli b. Mehmed Çelebi el-yesârî.