Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 650 Hüküm no: 689 Orijinal metin no: [106b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Mustafa’nın Mustafa Çelebi b. Hacı Ahmed’den aldığı borcu ödedikten sonra rehin verdiği eşyasının kendisine iadesine karar verildiği Şumnu kazâsına tâbi‘ Yanine nâm karye sâkinelerinden Rahime bt. Mustafa nâm hâtun tarafından husûs-ı âti’z-zikri da‘vâ ve talebe ve ahz u kabza ve kendiye ve îsâle vekîl olup nefs-i Alakenise sâkinlerinen Ahmed b. Osman ve Ömer Beşe b. Abdullah nâm kimesneler şehâdetleri ile vekâlete sâbite olan Hüseyin Bey b. Süleyman nâm kimesne meclis-i şer‘de mahmiye-i Edirne mahallâtından Karaca Bevvâb nâm mahalle sâkinlerinden işbu sâhibü’l-kitâb Mustafa Çelebi b. el-Hâc Ahmed el-yesârî nâm kimesne mahzarında bi’l-vekâle üzerine da‘vâ ve takrîr-i kelâm edip müvekkilem mezbûre Rahime târih-i kitâbdan sekiz sene mukaddem mezbûr Mustafa Çelebi’den üç bin altı yüz akçe istidâne edip yüz yetmiş sekiz bâfteli bir sîm kemer kuşak ve yüz dirhem bir sîm hamâil bağı rehin vaz‘ edip meblağ-ı mezbûr bi-tamâmihî dâyin-i merkūm Mustafa Çelebi’ye edâ ve teslîm olundukdan sonra zikrolunan rehinleri vermede muhâlefet eder suâl olunup alıverilmesini taleb ederim dedikde gıbbe’s-suâl mezbûr Mustafa Çelebi cevâbında meblağ-ı mezkûr üç bin altı yüz akçeden iki bin dokuz yüz doksan akçesini müvekkile-i mezbûre yedinden ahz u kabz edip hâlâ zimmetinde altı yüz on akçe hakkım kalmdı deyu mâ‘adâyı ahz ettiğini inkâr etmeğin vekîl-i merkūmdan beyyine taleb olundukda izhâr-ı acz ile istihlâf etdikde ol dahi alâ vechi’l-mes’ûl yemîn billâhi’l-aliyyi’l-a‘lâ ettikden sonra dâyin-i mezbûr Mustafa Çelebi meblağ-ı mesfûr altı yüz on akçeyi vekîl-i mezbûr Hüseyin Bey’den ahz ettikden sonra zikrolunan rehinleri teslîme tenbîh birle mâ-hüve’l-vâki‘ gıbbe’t-taleb ketb olundu. Hurrire fi’l-yevmi’l-hâmis ve’l-ışrîn min-Recebi’l-ferd li-sene semân ve sittîn ve elf. Şühûdü’l-hâl: Sinan Çelebi b. Murad el-kâtib, İsmail Çelebi b. el-Hâc Mehmed el-kâtib, el-Hâc Osman b. Ali, Halil Bey b. Eyüb, Cebeci Mustafa, Mehmed Bey ve gayruhüm.