Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 651 Hüküm no: 690 Orijinal metin no: [106b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Hasan Paşa’nın Nahılbend mahallesindeki menzilinin varisleri tarafından Mehmed Bey b. Mustafa Ağa’ya sekiz bin akçeye satıldığı Dâru’l-hilâfeti’l-aliyye Kostantıniyye el-mahmiyye sükkânından merhûm ve mağfûr Hasan Paşa’nın kebîr oğulları Dergâh-ı âlî dâme mahfûfen bi’l-me‘âlî kapıcıbaşılarından iftihâru’l-emâcid ve’l-ekârim câmi‘u’l-mehâmid ve’l-mekârim Hüseyin Bey -zîde mecdühü- ve li-ebeveyn karındaşlar mefâhiru’l-emâcid Ebûbekir Bey ve Mehmed Bey ve İbrahim Bey -zîde mecdühüm- meclis-i şer‘-i şerîfde hâmilü’l-kitâb fahrü’l-akrân Mehmed Bey b. Mustafa Ağa mahzarında herbiri ikrâr-ı tav‘î ve i‘tirâf-ı mer‘î edip mahrûse-i mezbûre mahallâtından Nahılbend mahallesinde sâkine iken fevt olan Kerime bt. Abdullah nâm hâtunun mahalle-i mezbûre dâhilinde vâki‘ bir tarafdan Hanife Hânım mülkü ve bir tarafdan Meleksima Hâtun Vakfı ve iki tarafdan tarîk-ı âmla mahdûd olan menzil-i mevrûsda min ciheti’l-velâ bize isâbet eden rub‘ hisse-i şer‘iyyemizi ma‘rifet-i şer‘iyye ba‘de’t-taksîm alâmât-ı fâsıla vaz‘ olundukdan sonra herbirimiz safka-i vâhide ile mûmâ-ileyh Mehmed Bey’e yüz sekiz bin nakd-i râyic fi’l-vakt akçeye bâtten bey‘ edip semen-i ma‘hûdü’l-kadri mesfûr Mehmed Bey yedinden tamâmen kabz ettikden sonra mezbûr Mehmed Bey’i mebî‘-i mesfûru’z-zikri mahallinde kabz ve tesellüme taslît eyledik ba‘de’l-yevm mülk-i müşterâsıdır keyfe mâ yeşâ ve yahtâr mutasarrıf olsun dediklerinde mukırrûn-ı merkūmûnun minvâl-i muharrer üzere sudûr eden ikrârların el-mukarru lehü’l-mezbûr Mehmed Bey bi’l-müvâcehe tasdîk edicek hâze’l-vesîka ketb ve imlâ ve yed-i talibe def‘ ve i‘tâ olundu. Tahrîren fi’l-yevmi’r-râbi‘ ve’l-ışrîn min şehri Recebi’l-ferd li-sene semân ve sittîn ve elf. Şühûdü’l-hâl: Fahrü’l-emâcid Hüseyin Bey Canpoladzâde, Fahrü’l-emsâl Mehmed Ağa b. Hüseyin kethüdâ, Fahrü’l-a‘yân Dilaver Ağa, Fahrü’l-küttâb Osman Efendi, İsmail Ağa b. Abdullah ve gayruhüm.