Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 652 Hüküm no: 691 Orijinal metin no: [106b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nemço v. Rado’nun kendisini haksız yere hapsedip cizye ve raiyyet vergisi alan Handan Ağa’dan dokuz bin sekiz yüz akçesini geri aldığı Vilâyet-i Rumeli’nden vâki‘ Çirmen kazâsı muzâfâtından Bulduköyü nâm karye zimmîlerinden Nemço v. Rado nâm zimmî meclis-i şer‘-i hatîr-i lâzimü’t-tevkīrde işbu hâmilü hâze’l-vesîka Dergâh-ı âlî müteferrikalarından mefharü’l-emâcid ve’l-a‘yân Handan Ağa mahzarında ikrâr ve i‘tirâf edip sâbıkā mezkûr Handan Ağa beni ahz ve der-zencîr edip pederin benim ra‘iyyetim ve [sen] ra‘iyyetim oğlusun deyu cizye ve resm-i ra‘iyyet nâmına bi’d-defe‘ât benden yirmi bir bin yüz akçem almış idi hâlâ hîn-i murâfa‘ada ra‘iyyeti olduğumu isbâta kādir olmamağın bi-hasebi’ş-şer‘i’l-kavîm meblağ-ı ma‘hûdü’l-kadri istirdâd edip da‘vâ ettiğimde dokuz bin sekiz yüz akçemi ikrâr edip mâ‘adâyı inkâr etmekle ikrârı sebkat ettiği dokuz bin sekiz yüz akçeyi istîfâ etmem için hükm-i şer‘î lâhık olup yedime hüccet-i şer‘iyye verilmiş idi el-hâletü hâzihî mûmâ-ileyh Handan Ağa’dan bana hükmolunan dokuz bin sekiz yüz akçeyi yedimde olan hüccet-i şer‘iyye nâtıka olduğu üzere tamâmen ahz u kabz eyledim dedikde gıbbe’t-tasdîk kayd-ı sicil olundu. Tahrîren fi’l-yevmi’l-hâmis min-Şa‘bân sene 1068. Şühûdü’l-hâl: Ahmed Efendi el-kādî, Ali Efendi el-kādî, Ali Ağa el-müteferrika, Mustafa Ağa el-müteferrika, İbrahim Çavuş, Ahmed Çelebi el-muhzır.