Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 652 Hüküm no: 692 Orijinal metin no: [106b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdürrahim b. Süleyman’ın cerîme adıyla kendisinden haksız yere para alan İbrahim Ağa b. Hacı Murtaza ile altmış guruş üzerine sulh olduğu Vilâyet-i Anadolu’da Hamidili sancağında vâki‘ Uluborlu nâm kasaba sâkinlerinden Abdürrahim b. Süleyman meclis-i şer‘de kasaba-i mezbûre sâkinlerinden işbu hâmilü’l-vesîka İbrahim Ağa b. el-Hâc Murtaza el-müteferrika mahzarında bi’t-tav‘i’s-sâf ikrâr ve i‘tirâf edip mezbûr İbrahim Ağa târih-i kitâbdan iki sene mukaddem cerîme nâmıyla benden yüz elli aded riyâlî guruşumu zulmen ahz u kabz etmişidi el-hâletü hâzihî ben dahi meblağ-ı merkūmu mezbûr İbrahim Ağa’dan da‘vâ ve isbât sadedinde iken Müslimûn-ı muslihûn tavassut edip es-sulhu seyyidü’l-ahkâm fehvâsınca altmış aded riyâlî guruş üzerine inşâ-i akd-i sulh eylediklerinde ben dahi vech-i muharrer üzere sulh-ı mezbûru kabûl ve bedel-i sulh olan meblağ-ı mezbûru merkūm İbrahim Ağa yedinden ahz u kabz edip sulh oldum dedikde gıbbe’t-tasdîk mâ-vaka‘a kayd şüd. Fî seneti’l-mezbûre. Şühûdü’l-hâl: Hüseyin Çavuş b. Mehmed an-sâkinân-ı Gönen, el-Hâc Hızır b. Hasan an-sâkinân-i Gönen, Receb b. Şa‘ban an-sâkinân-ı Borlu, Mehmed Çavuş b. Mustafa el-mübâşir, es-Seyyid Mehmed b. Şa‘ban an-sâkinân-ı Gönen ve gayruhüm.