Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 653 Hüküm no: 693 Orijinal metin no: [107a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rado v. Yani’nin Kazgan köyündeki mülk bağını zaptettiği iddiasıyla Hıristodoli v. Talaşni aleyhine açtığı davada haksız olduğu Mahmiye-i Edirne hısnı dâhilinde Papa Kaşyanos mahallesi sâkin[lerin]den Rado v. Yani nâm zimmî mahfil-i kazâda işbu bâ‘isü’l-kitâb Hıristodoli v. Talaşni nâm zimmî muvâcehesinde üzerine da‘vâ ve takrîr-i kelâm edip mahmiye-i mezbûre zeylinde Kazgan nâm karye sınırında vâki‘ bir tarafı Yano v. Kosta ve bir tarafı Takyeci Ostar nâm zimmîler bağlarıyla ve bir tarafı arz-ı hâliye ve taraf-ı râbi‘i tarîk-ı âm ile mahdûd tahmînen on dönüm mülk bağımı mezbûr Hıristodoli mülkiyet üzere tasarruf eder suâl olunup yed-i gāsıbesi kasr olunmak matlûbumdur dedikde gıbbe’s-suâl mezbûr Hıristodoli cevâbında fi’l-hakīka zikrolunan bağ-ı mezbûr Rado’nun mülkü idi ve lâkin târih-i kitâbdan sekiz sene mukaddem gāib ani’l-meclis Dimitri v. Hıristo nâm zimmîye sekiz bin fıddî akçeye bey‘-i kat‘î ile bey‘ ve teslîm ve kabz-ı semen edip mezkûr Dimitri dahi bağ-ı mezkûru altı sene tasarruf ettikden sonra bana yüz sekiz riyâlî guruşa bey‘-i kat‘î ile bey‘ ve teslîm edip bendahi iştirâ ve tesellüm ve kabûl ve kabz eyledikden sonra semeni olan meblağ-ı mezkûr yüz sekiz riyâlî guruşu mezkûr Dimitri’ye edâ ve teslîm edip hâlâ zikrolunan bağ mülk-i müşterâmdır deyu da‘vâ-yı def‘le mukābele edicek isre’l-istintâk mezbûr Rado def‘-i mezbûru bi’l-külliyye münkir olmağın mezbûr Hıristodoli’den takrîr-i meşrûhuna mutâbık beyyine taleb olundukda udûl-i ricâl ve ahrâr-ı Müslimînden olup mahmiye-i mezbûre mahallâtından Mihal Bey mahallesinden İbrahim Dede b. Mehmed eş-şehîr bi-Sârbânzâde (Mehmed el-me’mûr bi’l-umûri’ş-şer‘iyye) ve Tarakçı mahallesinden es-Seyyid Mehmed Efendi b. es-Seyyid Abdullah Efendi nâm kimesneler li-ecli’ş-şehâde meclis-i şer‘a hâzırân olup istişhâd olundukda fi’l-hakīka mahalle-i mezbûre zeylinde Kazgan nâm karye sınırında vâki‘ zikri sebk eden on dönüm bağ müdde‘î-i mezbûr Rado’nun mülkü olup târih-i kitâbdan sekiz sene mukaddem gāib ani’l-meclis Dimitri v. Hıristo nâm zimmîye sekiz bin fıddî akçeye bizim huzûrumuzda bey‘-i kat‘î ile bey ve teslîm ve kabz-ı semen edip mezkûr Dimitri dahi zikrolunan bağı altı sene mülkiyet üzere tasarrufundan sonra işbu mezbûr Hıristodoli’ye yüz sekiz riyâlî guruşa bey‘-i kat‘î ile bey‘ ve teslîm ve kabz-ı semen eyledi hâlâ bağ-ı mahdûd-ı mezkûr mezbûr Hıristodoli’nin mülk-i müşterâsıdır biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i [kabûlde] makbûle oldukdan sonra mezbûr Rado bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâbi‘ min-Şa‘bâni’l-mu‘azzam li-sene semân ve sittîn ve elf. Şühûdü’l-hâl: Fahrü’l-kuzât Hasan Efendi, İsmail Çelebi el-muhzır, Ahmed Çelebi el-muhzır, Ahmed Efendi el-kâtib, Muharriru’l-hurûf Hasan ve gayruhüm. Derûn-ı asl-ı metinde müsbete olan beyyinenin birisinde sehv olunup tescîlde dahi mukayyid hüccet-i mezbûreyi tebdîl etdirdikde bu mahal dahi ıslâh olundu.