Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 660 Hüküm no: 702 Orijinal metin no: [108b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nemço v. Rado’nun Zaim Handan Ağa b. Yunus’un raiyyeti oğlu olduğunu kabul edip her sene yüz yirmi akçe raiyyet vergisi vermeye söz verdiği Tatarpazacığı kazâsına tâbi‘ Koyundepe nâhiyesi muzâfâtından Meçka nâm karye za‘âmeti za‘îmi olan umdetü’l-eşbâh Handan Ağa b. Yunus meclis-i şer‘de za‘âmer-i mezbûre ra‘iyyeti oğlu râfi‘ü’s-sifr Nemço v. Rado nâm zımmî muvâcehesinde ikrâr ve taktîr-i kelâm edip ze‘âmet-i mezbûre bana berât-ı sultânî ile bana sadaka ve ihsân olalı kâmil yirmi iki sene olup mezbûr Nemço ze‘âmet-i mezbûreden hâriç Çirmen kazâsında Buldun nâm karyede sâkin olup ben dahi mezbûru bulup sinîn-i mâziyyede müctemi‘ olan ber-mûceb-i emr-i âlî çiftbozan resmini taleb ettiğimde bana dokuz bin sekiz yüz akçe def‘ ve teslîm edip ben dahi alıp kabz etmişidim ba‘dehû mezbûr Nemço şirrete sülûk ettikden sonra yine ze‘âmet-i mezbûre ra‘iyyeti oğlu olduğunu meclis-i şer‘de ikrâr edip ben dahi yedimde olan emr-i âlî ve sûret-i defter mûcebince da‘vâ ve talep ettiğimde beni beş bin akçe üzerine sulh ettiklerinde ben dahi sulh-ı mezbûru kabûl ve bedel-i sulh olan meblâğ-ı mezbûr beş bin akçeyi mezbûrun yedinden tamâmen alıp kabz edip ba‘de’l-yevm mezbûr Nemço ile husûs-ı mezbûra müte‘allika da‘vâ sâdır olursa lede’l-hükkâmi’l-kirâm mermû‘a olmaya dedikden sonra mezbûr Nemço dahi rızâsıyla beher sene mezbûr Handan Ağa’ya resm-i ra‘iyyet yüz yirmişer akçe vermeğe ta‘ahhüd etmeğin mâ-vak‘a bi’t-taleb ketb olundu. Tahrîren fi’l-yevmi’s-sâlis ve’l-ışrîn min şehri Şa‘bâni’l-mu‘azzam li-sene semân ve sitt’in ve elf. Şühûdü’l-hâl: Ahmed Beşe b. Mehmed, Hasan b. Ali, Mehmed b. Ali, Dilaver b. Abdullah, Ali b. Hasan ve gayruhûm