Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 661 Hüküm no: 703 Orijinal metin no: [108b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın Yalakabad’da kendi değirmeni ile aynı su mecrasında değirmeni olan İsmail Ağa ile suyun nöbetleşe kullanımı ve harkların tamiri hususunda anlaştıkları Dergâh-ı âlî dâme mahfûfen bi’l-me‘âlî kapıcıbaşılarından iftihârü’l-emâcid ve’l-mekârim Mustafa Ağa b. el-merhûm Ahmed Paşa meclis-i şer‘-i şerîf-i lâzimü’t-teşrîfde Vilâyet-i Anadolu’da Yalakabad kazâsına tâbi‘ Çelikyeri demekle ma‘rûf mevzi‘de vâki‘ iki göz değirmene mutasarrıf olan râfi‘ü’l-kitâb fahrü’l-akrân İsmail Ağa mahzarında ikrâr ve takrîr-i kelâm edip mezbûr İsmail Ağa’nın mârrü’z-zikr değirmeninin bâlâsında bizim dahi müşrif-i harâb değirmenimiz olup bu ana gelince tarafından intifâ‘ ettiğimiz cârî olan suyun mecrâsı bizim değirmenimizden mezbûr İsmail Ağa değirmeni harkına vâsıl olup minvâl-i muharrer üzere istimâl olunagelmişidi lâkin bir iki senedir eyyâm-ı sayfda hizmetkârlarımız nizâ‘ üzere olduklarında hâlâ tarafeynin rızâsı ile münâvebe edip iktizâ etdikde bir gün bizim değirmenimize ve bir gün dahi mezbûr İsmail Ağa değirmenine cârî olmak üzere muâhede olunup ve harc-ı hendek ve hark dahi ale’s-seviyye mâ-beynimizde sarf olunup ba‘de’l-yevm minvâl-i muharrer üzere terâzî olduğumuzu ketb ü tahrîr ve herbirimizin yedine hüccet-i şer‘iyye verilmek taleb ederiz dediklerinde mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min-Şa‘bâni’l-mu‘azzam li-sene semân ve sittîn ve elf. Şühûdü’l-hâl: Hasan Çavuş b. Mustafa Çavuş, Ahmed Ağa b. Receb. Mehmed Bey b. Ali, Receb Ağa b. Ali, Ahmed Beşe ve gayruhüm.