Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 661 Hüküm no: 704 Orijinal metin no: [108b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Hacı Mehmed’in tasarrufunda bulunan vakıf yağcı dükkanına Mehmed b. Turhan’ın müdahalesinin engellenmesi Mahrûse-i Edirne mahallâtından Kâtib-i cev mahallesi sâkinlerinden Mehmed b. Turhan nâm kimesne mahfil-i kazâda dükkân-ı âti’l-beyâna vâzı‘u’l-yed eylediği mütekarrir olan işbu bâ‘isü’l-kitâb Ahmed Çelebi b. el-Hâc Mehmed mahzarında üzerine da‘vâ ve takrîr-i kelâm edip merhûm Mehmed Paşa Evkāfı’ndan olup Üçşerefeli kurbünde vâki‘ bir tarafı el-Hâc Pervâne Vakfı olan dükkân ve bir tarafı helvacı dükkânı ile vakf-ı bozahâne ve taraf-ı râbi‘i tarîk-ı âmla mahdûd bir bâb yağcı dükkânı icâre-i mu‘accele-i ma‘lûme ve beher mâh yüz onar akçe ücret-i müeccele ile İsmail nâm kimesnenin taht-ı tasarrufunda olup dükkân-ı mezbûrun hakk-ı tasarrufunu vakf-ı mezbûr mütevellîsi olan Ahmed Ağa ma‘rifetiyle târih-i kitâbdan bir sene üç ay mukaddem bana iki bin iki yüz akçe bedel mukābilesinde tefvîz edip ben dahi tefevvüz ve kabûl eyledikden sonra bu mazmûnu üzere yedime mütevellî-i mezbûr Ahmed Ağa hat ve hatemini müştemil temessük dahi vermiş iken mezbûr Ahmed Çelebi bi-gayri vechin zabt etmişdir suâl olunup dükkân-ı mezbûrdan mezkûr Ahmed Çelebi[’nin] kasr-ı yedine tenbîh olunmak matlûbumdur dedikde gıbbe’s-suâl mezbûr Ahmed Çelebi cevâbında merkūm Mehmed târih-i kitâbdan bir sene mukaddem dükkân-ı mezbûru vech-i muharrer üzere benden da‘vâ ve taleb edip ben dahi zikrolunan dükkânımı târih-i kitâbdan beş sene mukaddem mütevellî olan diğer Ahmed Ağa ma‘rifetiyle iki bin iki yüz akçe bedel mukābilesinde tefvîz edip ben dahi tefevvüz ve kabûl eylediğimden sonra bedel-i mezkureyi yedimden zaman-ı mezbûrda bi’t-tamâm merkūm İsmail ahz u kabz etdikde muvâcehesinde isbât ve yedime târih-i merkūmda nâibü’ş-şer‘i’ş-şerîf Mustafa Efendi’nin hat ve hatemini müştemil hüccet-i şer‘iyye dahi aldım deyu ibrâz-ı hüccet edip müdde‘î-i merkūm Mehmed hüccet-i mersûmenin mazmûnunu münkir olmağın beyyine taleb olundukda yine mahrûse-i mezbûre mahallâtından el-Hâc Mercimek mahallesinden el-Hâc Hüseyin b. el-Hâc Kasım ve Hoca Bâli mahallesinde Süleyman Beşe b. Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında herbiri edâ-yı şehâdet-i şer‘iyye edip vâkı‘â müdde‘î-i merkūm Mehmed târih-i mersûmda zikrolunan dükkânı vech-i muharrer üzere mezbûr Ahmed’den da‘vâ edip ol dahi dört sene mukaddem İsmail nâm kimesneden mütevellî Ahmed Ağa ma‘rifetiyle iki bin iki yüz akçeye tefevvüz ve zabt eylediğin bi’l-müvâcehe nâib-i mezbûr huzûrunda isbât ve bu hücceti ihrâc eyledi dediklerinde gıbbe ri‘âyeti şerâiti’l-kabûl şehâdetleri makbûle oldukdan sonra mezbûr Mehmed mu‘ârazadan men‘ olunup mâ-hüve’l-vâki‘ bi’t-taleb ketb olundu cerâ zâlike ve hurrire. Fi’l-yevmi’l-ışrîn min-Şa‘bâni’l-mu‘azzam li-sene semân ve sittîn ve elf. Şühûdü’l-hâl: Fahrü’l-kuzât Abdurrahman Efendi b. Hüseyin, Fahrü’l-kuzât Ali Efendi b. Abdürrahim, Fahrü’l-kuzât es-Seyyid Sinan Efendi b. Mustafa, Ahmed Efendi b. Mehmed eş-Şumnuvî ve gayruhüm.