Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 662 Hüküm no: 705 Orijinal metin no: [108b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Delvine sancağına bağlı Aydonat kasabasından bazı zimmiler ve timar sipahilerinin kendilerinden kanunsuz olarak haraç, avarız akçesi ve timar mahsulü aldığını iddia ettikleri Ali Paşa ile iki yüz bin akçe üzerine sulh oldukları Vilâyet-i Rumeli’nden Delvine sancağında Aydonat kasabasına tâbi‘ Petroviçe nâm karye ahâlîsinden Papa Yani ve Yorgi Alaca ve Karbomot nâm karyeden Sembo (…) nâm karyeden Çayni ve Pano nâm zimmîler ve Coli [Curile?] nâm karyeden Papa Yorgi ve Lotlot nâm karyede Salamo ve karye-i Vira’dan [Vila] Zoto ve karye-i Branide’den Nikola ve karye-i Hatmandada’dan Devlet ve Mazarak kazâsına tâbi‘ Kızılkuyu nâm karyede Yani ve Korpani nâm karyeden Kuka ve karındaşı Göni nâm zimmîler ve İksafor nâm karyeden Miho nâm zimmîler ve (…) mezbûre timarı sipâhîlerinden Süleyman Bey b. Mustafa ve Arslan Bey b. Mehmed ve Kaplan ve Hasan ve Osman Bey nâm kimesneler meclis-i şer‘-i hatîr-i lâzimü’t-tevkīrde Vilâyet-i Anadolu’da Niğde sancak beyi olup hâlâ mârrü’z-zikr Aydonat kasabası sükkânından Piko demekle meşhûr hâfızu hâze’l-kitâb kıdvetü’l-akrân Ali Paşa tarafından ikrâr-ı âti’l-beyânı tasdîka vekîl olup İbrahim Çavuş b. Mahmud ve Hasan Ağa b. Şa‘ban nâm kimesneler şehâdetleriyle şer‘an vekâleti sâbite olan iftihârü’l-ümerâ’i’l-kirâm sâbıkā Eğre beylerbeyisi olan Mehmed Paşa mahzarında bi-ecma‘ihim müctemi‘u’l-kelime ikrâr ve takrîr-i kelâm ettiklerinde paşa-yı müşârun-ileyh zimmetinde müctemi‘ olan harâc ve avârız akçeleri ziyâdesini ve sâlifü’z-zikr timarların mahsûlünden bundan akdem ahz u kabz ettiği mahsûlâtı paşa-yı müşârun-ileyhden da‘vâ ve taleb ettiğimizden cümlemizin mâ-beynine Müslimûn ve muslihûn tavassut edip cümlemizi her kîsesi kırkar bin akçe olmak üzere beş aded kîse guruşa sulh edip ve bedel-i sulh olan meblağ-ı mezbûr beş aded kîse guruş cümlesini bi’t-tamâm müşârun-ileyh Ali Paşa yedinden alıp kabz etdik ba‘de’l-yevm mezbûr Ali Paşa zimmetinde harâc ve avârız ve timar mahsûllerinden bir akçe ve bir habbe bâkī kalmayıp zimmetini cümlemiz de‘âvîden ibrâ ve ıskāt etdik [109a] mazmûn-ı kitâba muhâlif herbirimizden da‘vâ ve nizâ‘ sâdıre olursa lede’l-hükkâmi’l-kirâm mesmû‘a olmaya dediklerinde mâ-hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min şehri Ramazâni’l-mübârek li-sene semân ve sittîn ve elf. Şühûdü’l-hâl: Mehmed Ağa b. Hüseyin Delvineli, Mustafa Çelebi, Arslan Ağa b. Ahmed voyvoda, Haydar Ağa b. Ahmed Çelebi, Osman Ağa [b.] el-Hâc Mansur ve gayruhüm.