Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 663 Hüküm no: 706 Orijinal metin no: [109a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey b. Mustafa’nın Mazarak kazasındaki çiftliğini kendisine iade eden Ali Paşa aleyhine açtığı kışla davasından vazgeçtiği Vilâyet-i Rumeli’nde Delvine sancağına vâki‘ Aydonat kasabası sâkinlerinden umdetü’l-akrân Ali Bey b. Mustafa nâm kimesne meclis-i şer‘-i şerîf-i lâzimü’t-teşrîfde sâbıkā Niğde sancak beyi olan emîrü’l-ümerâ’i’l-kirâm Ali Paşa tarafından tasdîk-i âti’l-beyânı vekîl-i sâbitü’l-vekâlesi olan iftihârü’l-ümerâ’i’l-kirâm sâbıkā Eğre beylerbeyisi olan Mehmed Paşa mahzarında ikrâr ve takrîr-i kelâm edip müvekkil-i mezbûr Ali Paşa bundan akdem silk-i mülkümde münselik olup vilâyet-i mezbûrede Mazarak kazâsına tâbi‘ Dragotin nâm karyede vâki‘ Dolyani demekle meşhûr mevzi‘de vâki‘ çiftliğimi ve Tolka Kışlası demekle ma‘rûf bir tarafı Kalemedere ve bir tarafı Tarmoz karyesi ve bir tarafı Verefnoz karyesi ve taraf-ı râbi‘i yine vâdi olan kışlağı mezbûr Ali Paşa ekārib-i ba‘îdeden olup vâris olmak zu‘mu ile zabt u tasarruf etmişidi hâlâ sâlifü’z-zikr çiftliğimi bana cümle tevâbi‘ [ve] levâhıkıyle verip ben dahi mukābilesinde mârrü’z-zikr kışla da‘vâsından fâriğ olup ba‘de’l-yevm zikrolunan kışlağa müte‘allik da‘vâdan zimmetini ibrâ ve ıskāt ettim keyfe mâ yeşâ ve yahtâr mutasarrıf ola dedikde mukırr-ı mezbûrun minvâl-i muharrer üzere cârî olan ikrârını el-mukarru lehü’l-mezbûr vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ min şehri Ramazâni’l-mübârek li-sene semân ve sittîn ve elf. Şühûdü’l-hâl: Mehmed Ağa b. Hasan Ağa Delvineli, Mustafa Çelebi, Arslan Ağa b. Ahmed voyvoda, Haydar Ağa b. Ahmed Çelebi, Osman Ağa el-Hâc Mansur ve gayruhüm.