Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 664 Hüküm no: 707 Orijinal metin no: [109a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sipahi Ahmed Bey b. Oruç’un Mazarak kazasındaki bazı emlak, arazi, eşya ve hayvanlarını haksız yere zaptettiği iddiasıyla Ali Bey aleyhine açtığı davada yirmi dört bin akçe üzerine sulh olduğu Delvine sancağında vâki‘ Aydonat kasabası sükkânından olup erbâb-ı timardan olan Ahmed Bey b. Oruc nâm sipâhî meclis-i şer‘-i hatîr-i lâzimü’t-tevkīrde yine kasaba-i mezbûre sükkânından olup sâbıkā Niğde sancak beyi olan fahrü’l-ümerâ’i’l-kirâm Piko demek ile ma‘rûf Ali Bey tarafından sulh-ı âti’l-beyânı tasdîka vekîl olup vekâleti Mehmed Ağa b. Hüseyin ve Hasan Çavuş b. Mehmed şehâdetleri ile şer‘an sâbite olan Hasan Bey b. Şa‘ban nâm kimesne mahzarında ikrâr ve takrîr-i kelâm edip müvekkil-i merkūm Ali Bey bundan akdem teğallüben ve gasben benim mülküm olup Mazarak kazâsında Ratvişte nâm karyede vâki‘ lede’l-ahâlî hudûdu ma‘lûm çiftliğimi ve un değirmenimi ve bir bâb zeytun değirmenimi ve beş yüz elli re’s koyunumu ve beş yüz yirmi kanata zeyt yağımı ve altmış himl buğdayımı ve Aydonat kasabasında vâki‘ lede’l-ahâlî hudûdu ma‘lûm mülk menzilimi ve beynimizde ilm-i şer‘î ile ma‘lûm esâs-ı beyt ve evân-i nuhâs ve sâir yedinde olan defteri nâtık eşyâmı bî-vech ahz u kabz edip ben dahi kendiden taleb ve da‘vâ eylediğimde beynimizde muhâsamât-ı şedîde vâkı‘a olmuşidi el-hâletü hâzihî beynimizde muslihûn tavassut edip es-sulhu seyyidü’l-ahkâm fehvâsı üzere da‘vâ-yı mezkûrumdan beni yirmi dört bin nakd-i râyic fi’l-vakt akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru’n-na‘t yirmi dört bin akçeyi müvekkil-i müşârun-ileyh Ali Bey yedinden tamâmen ahz u kabz edip zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm husûs-ı mezbûra müte‘allika benden da‘vâ ve nizâ‘ sudûr ve zuhûr eder ise lede’l-hükkâmi’l-kirâm mesmû‘a olmaya dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâdis min şehri Ramazâni’l-mübârek li-sene semân ve sittîn ve elf. Şühûdü’l-hâl: Emîru’l-ümerâ’i’l-kirâm Mehmed Paşa mîr-i mîrân sâbıkā, Mehmed Ağa b. Hüseyin Ağa an-kazâ-i Delvine, Hasan Çavuş b. Mehmed el-mübâşir, Derviş Çelebi b. Hüseyin Bey, Arslan Ağa b. Ahmed, Haydar Ağa b. Ahmed gulâm-ı şâhî, Mehmed Bey b. Hüseyin Şâh Bey, Ali Bey b. Seydi Bey, Bayram Beşe çukadâr ve gayruhüm mine’l-huzzâr.