Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 665 Hüküm no: 708 Orijinal metin no: [109a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niğde Sancak Beyi Ali Paşa’nın Mazarak kazasında tasarrufunda bulunan çiftliği tüm müştemilatıyla birlikte Ali Bey b. Mustafa’ya verdiği Vilâyet-i Rumeli’nde Delvine sancağında vâki‘ Aydonat kasabası sükkânından olup bundan akdem Niğde sancak beyi olan emîrü’l-ümerâ’i’l-kirâm Piko demekle şehîr Ali Paşa tarafından husûs-ı âti’l-beyânı ikrâra vekîl olup Boyacı İbrahim Çavuş b. Mehmed ve Hasan Ağa b. Şa‘ban nâm kimesneler şehâdetleri ile şer‘an vekâleti sâbite olan iftihâru’l-ümerâ’i’l-kirâm sâbıkā Eğre beylerbeyisi olan Mehmed Paşa b. İbrahim meclis-i şer‘-i hatîr-i lâzimü’t-tevkīrde kasaba-i mezbûre sükkânından Ali Bey b. Mustafa nâm kimesne mahzarında bi’l-vekâle ikrâr ve takrîr-i kelâm edip vilâyet-i mezbûrede Mazarak kazâsına tâbi‘ Dragotin nâm karye sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd Dolyani demekle ma‘rûf mevzi‘de vâki‘ dâhiliyesi tahtânî müte‘addid odaları ve köşkü ve matbahı ve kileri ve hâriciyesi fevkānî iki aded beyti ve ahırları ve yine mevzi‘-i mezbûr kurbünde vâki‘ ma‘lûmü’l-hudûd bahçesi ve çift ahırlarıyla ve Molla Murad Kulesi demekle ma‘rûf büyût-ı müte‘addideyi ve sâbıkā Mustafa Kethüdâ[’nın] mutasarrıf olduğu müte‘addid odaları ve bostanları ve harman yerleri ve kupaları ve müte‘addid bahçeleri hâvî mülk çiftlik mezbûr Ali Bey’in ceddi merhûm Mehmed Bey çiftliği olup hâl-i hayâtında mezbûr Ali Bey’e hâl-i sıgārında hibe ve temlîk ve velâyeten kabz edip mezbûr Mehmed Bey fevtinden sonra müvekkilim müşârun-ileyh Ali Paşa ekārib-i ba‘îdeden olup vâris olmak zu‘muyla mârrü’z-zikr çiftliki zabt u tasarruf etmişidi el-hâletü hâzihî müvekkilim mezbûr Ali Paşa sâlifü’z-zikr çiftliği bi-cümleti’t-tevâbi‘ ve’l-levâhık mezbûr Ali Bey’e verip ba‘de’l-yevm alaka ve müdâhalesi kalmamışdır eğer husûs-ı mezbûra müte‘allik müvekkilim mezbûr Ali Paşa’dan da‘vâ ve nizâ‘ sâdıre olursa lede’l-hükkâmi’l-kirâm mesmû‘a olmaya dedikde mâ-hüve’l-vâki‘ bi’t-taleb ketb olundu. Tahrîren fi’r-râbi‘ min şehri Ramazâni’l-mübârek li-sene semân ve sittîn ve elf. Şühûdü’l-hâl: Emîru’l-ümerâ’i’l-kirâm Mehmed Paşa b. İbrahim, Umdetü’l-küberâ’i’l-kirâm Ali Paşa b. Ömer, İbrahim Çavuş, Hasan Çavuş, Ahmed Bey b. Oruc, Derviş Çelebi, Şâtır Mustafa, diğer Şâtır Mehmed Bey, Hasan Çelebi b. Turgud, diğer Hasan Çelebi b. Turgut, Süleyman Çelebizâde.