Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 666 Hüküm no: 709 Orijinal metin no: [109a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Sedani ve kardeşi Zika’nın kardeşleri İlya v. Nika’nın ölümüne sebep olduğu iddiasıyla Delvine Sancağı Mutasarrıfı Ali Paşa aleyhine açtıkları kan ve diyet davasında iki yüz elli guruşa sulh oldukları Vilâyet-i Rumeli’nde Delvine sancağında Mazarak kazâsına tâbi‘ Konosmol nâm karyede sâkin iken bundan akdem mürd olan İlya v. Nika nâm zimmînin verâseti zevce-i metrûkesi Mariya nâm zimmiyyeye ve li-ebeveyn karındaşları Papa Sedani ve Zika nâm zimmîlere münhasır olduğu şer‘an muhakkak oldukdan sonra mezbûr Papa Sedani asâleten [ve] mezbûre Zika tarafından [vekâleten] meclis-i şer‘-i hatîr-i lâzimü’t-tevkīrde hâlâ mârrü’z-zikr Delvine sancağına ber-vech-i arpalık mutasarrıf olan emîrü’l-ümerâ’i’l-kirâm Ali Paşa mahzarında bi’l-asâle ve bi’l-vekâle ikrâr ve takrîr-i kelâm edip mûrisimiz mezbûr paşa-yı müşârun-ileyh hazretlerinin sancak ra‘iyyeti olup âdemleriyle mâ-beynlerinde nizâ‘ ve muhârebe olmağla mürd-i mezbûrun helâkine bâ‘is ve bâdî oldun deyu paşa-yı müşârun-ileyhden dem ve diyete müte‘allik da‘vâ ettiğimde bizi muslihûn-ı mütevessilûn ile iki [yüz] elli guruş üzere sulh ettiklerinde biz dahi sulh-ı mezbûru kabûl ve bedel-i sulh olan meblağ-ı mezbûru bi’t-tamâm ve’l-kemâl ahz u kabz edip ba‘de’l-yevm karındaşımız mürd-i mezbûrdan paşa-yı müşârun-ileyh ile dem ve diyetine müte‘allik da‘vâ ve nizâ‘ımız kalmamışdır husûs-ı mezbûra müte‘allik da‘vâ ve nizâ‘dan zimmetini ibrâ-i âm ile ibrâ ve ıskāt etdik dediklerinde mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ min şehri Ramazâni’l-mübârek li-sene semân ve sittîn ve elf. Şühûdü’l-hâl: Umdüte’l-ümerâ’i’l-kirâm Mehmed Paşa b. ( ) mîr-i mîrân, İbrahim Çavuş b. Mehmed, Hasan Çavuş b. Şa‘ban, Hasan Bey b. Mehmed ve gayruhüm.