Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 666 Hüküm no: 710 Orijinal metin no: [109a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marina tarafından kocası Niko v. Koçı’nın ölümüne sebep olduğu iddiasıyla Delvine Sancağı Mutasarrıfı Ali Paşa aleyhine açtığı kan ve diyet davasında iki yüz elli guruşa sulh olduğu Vilâyet-i Rumeli’nden Delvine sancağında Mazarak kasabası muzâfâtından Konosmol nâm karyede sâkin iken bundan akdem mürd olan Niko v. Koçı nâm zimmînin verâseti zevce-i metrûkesi Marina nâm zimmiyye ile sulbî oğlu Koçı nâm sagīre münhasır olduğu şer‘an mütehakkık oldukdan sonra sagīr-i mezbûrun vasiyy-i şer‘îsi ve mezbûre Marina tarafından vekîl olup bi-mâ-hüve tarîku’s-sübût şer‘an vekâleti sâbite olan Papa Midas v. Nika nâm zimmî meclis-i şer‘-i şerîf-i lâzimü’t-tevkīrde hâlâ zikrolunan Delvine sancağına ber-vech-i arpalık mutasarrıf olan umdetü’l-ümerâ’i’l-kirâm Ali Paşa mahzarında vesâyeten ve vekâleten ikrâr ve takrîr-i kelâm edip mürd-i mezbûr paşa-yı müşârun-ileyhin sancağı ra‘iyyeti olup âdemleri kıbelinden nizâ‘ ve muhârebe olmağla mürd-i mezbûr ol muhârebede helâk olmağla paşa-yı müşârun-ileyhden dem ve diyetine müte‘allik da‘vâ ve nizâ‘ olmuşdu el-hâletü hâzihî mâ-beynimize Müslimûn ve muslihûn tavassut etmekle ben dahi şer‘an isbâta kādir olmamağın sagīre-i mezbûre nâfi‘ olduğu cihetden beni iki yüz elli guruşa sulh ettiklerinde ben dahi sulh-ı mezbûru kabûl ve bedel-i sulh meblağ-ı mezbûr iki yüz elli guruş ve karye-i mezbûre ahâlîsinin avârız ve harâc muhâsebesinden paşa-yı müşârun-ileyh zimmetinde olan otuz guruşu cem‘an iki yüz seksen guruşu alıp kabz edip paşa-yı müşârun-ileyh ile kat‘an da‘vâ ve nizâ‘ım kalmamışdır sudûr dahi ederse lede’l-hükkâmi’l-kirâm mesmû‘a [109b] olmaya dedikde mâ-hüve’l-vâki‘ gıbbe’t-taleb ketb olundu. Tahrîren fi’l-yevmi’r-râbi‘ min şehri Ramazâni’l-mübârek li-sene semân ve sittîn ve elf. Şühûdü’l-hâl: İftihâru’l-ümerâ’i’l-kirâm Mehmed Paşa mîr-mîrân-ı Eğri sâbıkā, İbrahim Çavuş b. Mehmed, Hasan Çavuş b. Şa‘ban, Mehmed Ağa, Mustafa Bey, Hasan Ağa ve gayruhüm.