Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 667 Hüküm no: 711 Orijinal metin no: [109b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Konevî Mehmed Efendi’nin Mehmed Efendi b. Ferruh’ta olan beş yüz on beş guruş ve yetmiş hurda akçe alacağının vasisi Hâfız Mehmed Efendi tarafından tahsili Hüccet-i vesâyet-i Hâfız Efendi. Mahmiye-i İstanbul’da bundan akdem Sofular mahallesi sükkânından olup hâlâ medîne-i Edirne’de civâr-ı rahmet-i rahmâna vâsıl olan merhûm Konevî Mehmed Efendi’nin techîz ve tekfîni ve sâir vesâyâ-yı mu‘ayyenesini tenfîze vasiyy-i muhtârı olan umdetü’l-müderrisîni’l-kirâm Hâfız Mehmed Efendi meclis-i şer‘de fahrü’l-müderrisîn Mehmed Efendi b. Ferruh mahzarında takrîr-i kelâm edip müteveffâ-yı mezbûr Mehmed Efendi’nin sâbıkā defter emîni olan iftihâru’l-ümerâ’ ve’l-ekâbir Kelamî Mustafa Efendi zimmetinde dört yüz yetmiş aded tamâm riyâlî guruş hakkı olmağla alıp kabz ettikden sonra mezbûr Mehmed Efendi’ye bi-tarîkı’l-vedî‘a def‘ ve teslîm edip mezbûr dahi vech-i muharrer üzere tesellüm ve kabz edip ve bir def‘a dahi kırk beş aded guruş ile yetmiş hurde akçe kezâlik def‘ ve teslîm edip cem‘an beş yüz on beş aded tamâm guruşu ile yetmiş hurde akçesi mezbûr Mehmed Efendi’den vesâyetim hasebiyle taleb ederim dedikde gıbbe’s-suâl mezbûr Mehmed Efendi cevâbında fi’l-vâki‘ müteveffâ-yı mezbûr Mehmed Efendi hâl-i hayâtında alıp kabz ettiği meblağ-i mezbûr dört yüz yetmiş aded tamâm guruşu ve bir def‘a dahi kırk beş aded guruş ile yetmiş hurde akçesi bi-tarîkı’l-vedî‘a bana teslîm edip ben dahi tesellüm ve kabûl ve kabz ettim lâkin müşârun-ileyh Hâfız Mehmed Efendi’nin vech-i muharrer üzere vasiyy-i muhtârı oldukları ma‘lûmum değildir dedikde müdde‘î-i müşârun-ileyhden müdde‘âsını mübeyyine beyyine taleb olundukda iftihâru’l-müderrisîni’l-kirâm Mustafa Efendi b. Nurullah ve Osman [Bey] nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı mezbûr Mehmed Efendi hâl-i hayât ve kemâl-i akl [ve] sıhhatinde müşârun-ileyh Hâfız Efendi bizim huzûrumuzda minvâl-i muharrer üzere vasiyy-i muhtâr nasb ve ta‘yîn edip onlar dahi vesâyet-i mezbûreyi kabûl ve hizmet-i lâzımesini edâya müte‘ahhid olduk dediklerinden sonra mezbûr Mehmed Efendi i‘tirâfı mûcebince meblağ-ı mezbûrun def‘ ve teslîmiyle ilzâm olunmağın mâ-vaka‘a bi’t-taleb ketb olundu. Tahrîren fi’l-yevmi’s-sâmin ve’l-ışrîn min-Şa‘bâni’l-mu‘azzam li-sene semân ve sittîn ve elf. Şühûdü’l-hâl: İbrahim Efendi b. Hızır Efendi, Fahrü’l-a‘yân Ahmed Ağa b. ( ), İsmail Çelebi b. Ahmed, Mehmed Atâullah Çelebi b. İbrahim, Bayram Beşe b. ( ).