Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 668 Hüküm no: 712 Orijinal metin no: [109b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi b. Hasan’ın Mehmed Ağa b. Abdullah’ta olan bin dört yüz elli guruş alacağının kefaletinden dolayı Hüseyin b. Mahmud’dan tahsil olunduğu Mahmiye-i İstanbul’da merhûm Mehmed Ağa Câmi‘-i şerîfi imâmı olan umdetü’l-eimmeti’l-kirâm Ali Efendi b. Hasan tarafından husûs-ı âti’l-beyânı ahz u kabza ve kendiye îsâle ve îsâl mütevakkıf olduğu umûrun cümlesine vekîl olup bi-mâ-hüve tarîku’s-sübût şer‘an vekâleti sâbite olan el-Hâc Hüseyin b. Mehmed nâm kimesne meclis-i şer‘-i hatîr-i lâzimü’t-tevkīrde râfi‘ü’l-kitâb Mehmed Ağa b. Abdullah nâm kimesne mahzarında bi’l-vekâle ikrâr ve takrîr-i kelâm edip mezbûr Mehmed Ağa zimmetinde müvekkilim mûmâ-ileyh Ali Efendi’nin bin dört yüz elli aded kâmil guruş cihet-i deyn-i şer‘îden hakkı olmağla sekiz yüz kırk guruşluk iskarlet ve londrine çukalar envâ‘ından yüz yetmiş zirâ‘ çuka Mehmed Ağa yedinden alıp kabz edip meblağ-ı mezbûr bin dört yüz elli guruşa hâzır bi’l-meclis olan Hüseyin b. Mahmud nâm kimesne tarafından emr [ve] kabûlü hâviye kefâlet-i sahîha-i şer‘iyye ile kefîl olmuşdu hâlâ kefîl-i mezbûr Hüseyin’in mahmiye-i mezbûrede Üsküblü mahallesinde vâki‘ icâre-i mu‘accele ve on iki akçe dahi müeccele ile mutasarrıf olduğu bir tarafı sâbıkā bostancıbaşı mülküne ve bir tarafı Südcüler mülküne ve iki tarafı tarîk-ı hâssa müntehî bir bâb tahtânî ve bir bâb fevkānî menzilin ve yine mahalle-i mezbûrede vâki‘ icâre-i mu‘accele ile ve kezalik âhara (icâre-i) müeccele ile mutasarrıf olduğu bir tarafı yine mezbûr bostancıbaşı mülküne ve bir tarafı Emine Hâtun mülküne ve iki tarafı tarîk-ı hâssa müntehî bir bâb tahtânî ve bir bâb fevkānî odaları müştemil menzilin hakk-ı tasarruflarını altı yüz on aded guruş mukābilesinde kefâleti hasebiyle ma‘rifet-i mütevellî ile ferâğ ve tefvîz edip ben dahi bi’l-vekâle me’mûr olmağla tefevvüz [ve] kabûl edip min ba‘d meblağ-ı mezbûrun dört yüz elli aded guruşdan asîl-i mezbûr Mehmed Ağa zimmetinde müvekkilim mezbûrun bir akçe ve bir habbe hakkı bâkī kalmadı dedikde vekîl-i mersûmun minvâl-i muharrer üzere cârî olan ikrârı el-mukarru lehümâ’l-mezbûrân Mehmed Ağa ve kefîl Hüseyin vicâhen tasdîk ve şifâhen tahkīk ettikden sonra mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ min şehri Ramazâni’l-mübârek li-sene semân ve sittîn ve elf. Şühûdü’l-hâl: Ali Efendi b. Mehmed el-kādî, Ahmed Çelebi b. Ali, Abdurrahman b. Murtaza, Ahmed Ağa el-mütevellî, Mehmed Çelebi [b.] Osman.