Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 670 Hüküm no: 714 Orijinal metin no: [110a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe b. Ahmed’in alacak hususunda Hassa Ekmekçibaşı Ömer Ağa b. Ali’nin zimmetini ibra ettiği Mahmiye-i İstanbul’da sâkin Camcı mahallesinde Hasan Beşe b. Ahmed nâm kimesne meclis-i şer‘de hâssa ekmekçibaşı olan umdetü’l-akrân Ömer Ağa b. Ali nâm kimesne mahzarında takrîr-i da‘vâ edip mezbûr Ömer Ağa zimmetinde cihet-i deyn-i şer‘îden yirmi sekiz bin akçe hakkım olup bundan akdem on iki bin akçesini yedinden alıp bâkī on altı bin akçe hakkım kalmışdır suâl olunup alıverilmesi matlubumdur dedikde gıbbe’s-suâl mezbûr Ömer Ağa cevâbında fi’l-vâki‘ müdde‘î-i mezbûrun zimmetimde cihet-i mezbûreden yirmi sekiz bin akçe hakkı olup meblağ-ı mezbûrdan on iki bin akçesini kendim mezbûra edâ edip bâkī meblağ-ı mârrü’z-zikr on altı bin akçeyi şerîkim olup hâzır bi’l-meclis olan Mehmed Beşe b. Hüseyin’in Todori nâm zimmî zimmetinde on altı bin akçe hakkı olmağla meblağ-ı mezbûru havâle ettiğimizde zimmî-i mezbûr dahi meblağ-ı mezbûr on altı bin akçeyi mezbûra teslîm edip zimmetimde bir akçe bâkī kalmamışdır dedikde gıbbe’l-istintâk mezbûr Hasan Beşe dahi zimmî-i mezbûr meblağ-ı mezbûr on altı bin akçeyi alıp kabz ettiğini mu‘terif olmağın mâ-vaka‘a bi’t-taleb ketb olundu. Tahrîren fi’l-yevmi’r-râbi‘ min şehri Ramazâni’l-mübârek li-sene semân ve sittîn ve elf. Şühûdü’l-hâl: Umdetü’l-akrân Mustafa Ağa b. ( ) el-mübâşir, Ahmed Beşe b. ( ) bezzâz, Süleyman b. Ahmed, Dilaver b. Abdullah ve gayruhüm.