Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 670 Hüküm no: 715 Orijinal metin no: [110a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş b. Receb’in Hüseyin Ağa’da alacağı iddiasıyla varisleri aleyhine açtığı davada iddiasını ispat edemediği Mahmiye-i İstanbul sükkânından olup Melek Ahmed Paşa ağalarından İbrahim Çavuş b. Receb nâm kimesne meclis-i şer‘-i hatîr-i lâzimü’t-tevkīrde bundan esbak mahmiye-i mezbûre[de] vâki‘ Yenibahçe kurbünde Karabaş mahallesinde sâkin iken bundan akdem müteveffâ olan Hüseyin Ağa b. Hasan nâm sipâhînin evlâd-ı sıgāra vasiyy-i muhtâr ve kebîre kızı Fâtıma Hâtun tarafından husûs-ı âti’l-beyânı vekîl-i sâbitü’l-vekâlesi olan zevci râfi‘ü’l-kitâb Hüseyin Bey b. Mustafa nâm kimesne mahzarında üzerine takrîr-i da‘vâ edip mezbûr Hüseyin Ağa’ya hâl-i hayâtında iki yüz guruş ikrâz edip yüz guruş yedinden ahz u istîfâ edip bâkī zimmetinde yüz guruş hakkım olup ve yine mezbûr Hüseyin timar defterdârlığı için üç yüz guruş verip iki yüz yirmi guruşunu yedinden kezâlik alıp kabz edip bâkī zimmetinde seksen guruş hakkım olup ve bir âl at bahâsından kırk guruş ve bir kır tay bahâsından altmış guruş ve bir sâye çuka ferâce bahâsından kırk guruş ve bir kır katır bahâsından kırk guruş ve bir müsta‘mel kürk bahâsından otuz guruş ve’l-hâsıl ba‘de külli hesâb zimmetinde dört yüz kırk aded guruş hakkım vardır suâl olunup tereke-i vâfiyyesinden alıverilmek taleb ederim dedikde gıbbe’s-suâl mezbûr Hüseyin Bey cevâbında fi’l-vâki‘ müteveffâ-yı mezbûrun merkūm İbrahim Çavuş’a vech-i muharrer üzere deyni olduğu mukarrer olup lâkin hâl-i hayâtında deyn-i mezkûr da‘vâsından müteveffâ-yı mezbûr Hüseyin Ağa zimmetini müşâfeheten mahzar-ı Müslimînde ibrâ ve ıskāt edip zimmetinde bir akçe ve bir habbe hakkı bâkī kalmamışdır dedikde gıbbe’l-inkâr mezbûr Hasan Ağa’dan müdde‘âsını mübeyyine beyyine taleb olundukda udûl-i Müslimîn ve sikāt-ı muvahhidînden olup mahalle-i mezbûre sükkânından Mehmed Ağa b. Ali el-cündi ve el-Hâc Receb b. Ali ve Mehmed b. Hüseyin nâm kimesneler meclis-i şer‘a li-ecli’ş-şehâde hâzırân olup istişhâd olunduklarında fi’l-vâki‘ mezbûr İbrahim Çavuş müteveffâ-yı mezbûr Hüseyin Ağa’nın zimmetinde olan meblağ-ı mezbûr da‘vâsından hayâtında müşâfeheten bizim huzûrumuzda mezbûr Hüseyin Ağa’nın zimmetini ibrâ ve ıskāt etdi biz bu husûsa şâhidleriz şehâdet dahi ederiz deyu herbiri şehâdet-i şer‘iyye ettiklerinde gıbbe ri‘âyeti şerâit-i kabûl şehâdetleri hayyiz-i kabûlde vâki‘ oldukdan sonra mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâmin min şehri Ramazâni’l-mübârek li-sene semân ve sittîn ve elf. Şühûdü’l-hâl: Mehmed Ağa ser-cebeciyân, Oruc Ağa kethüdâyeri, Sun‘ullah Ağa el-cündi, Mustafa Ağa el-cündi, Yusuf Bey el-cündi, İbrahim Bey el-cündi, Mehmed Bey el-cündi, Ali Bey el-cündi, Mustafa Bey el-cündi, Kadri Çavuş el-mübâşir.