Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 671 Hüküm no: 716 Orijinal metin no: [110a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Bâli’nin merhum Mehmed b. Bali’nin kardeşi ve varisi olduğunu ispat ettiği Hâlâ kasaba-i İznik kādısı olan umdetü kuzâti’l-İslâm Mevlânâ Hasan Efendi b. Yahya imzâsıyla mümzâ ve hatemi ile mahtûm zeylinde vâki‘ bin altmış senesi Cumâdelâhıre evâili târihi ile müverrah nakl-i şer‘î vârid olup mazmûnunda an-asl Taraklı Yenicesi kazâsına tâbi‘ Sülealanı nâm karye sükkânından olup hâlâ kasaba-i İznik muzâfâtından Ömer-i kebîr nâm karyede mutavattın olan bâ‘isü’l-kitâb Yusuf b. Bâli nâm kimesneden vech-i âtî üzere da‘vâ-yı sahîha ile mesbûku’l-istişhâd-ı şer‘î sudûrundan sonra yine karye-i mezbûrede mutavattın İvaz Hoca b. Bâli ve Receb b. Ahmed b. Oğuz Ali nâm kimesneler nakl-i tahvîl için mahall-i cerh ve ta‘dîle hâzırân olup şöyle edâ-i şehâdet-i şer‘iyye eylediler ki attâr tâifesinden olup mahmiye-i Edirne’de Kıyık mahallesi sâkinlerinden bundan akdem müteveffâ olan Mehmed b. Bâli nâm kimesnenin muhallefâtı mahmiye-i mezbûrede emîn-i beytü’l-mâl yedinde mazbûta olup müsteşhid-i mezbûr Yusuf ile li-ebeveyn karındaşlar olup babaları ismi Bâli ve vâlidelerinin Emine ve cedleri Pîrî ve maskat-i re’sleri karye-i mezbûre Sülealanı olup müteveffâ-yı mezbûrun verâseti müsteşhid-i mezbûra münhasıradır bundan gayrı vâris-i ma‘rûfu ve terekesine müstahıkk-ı âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a olduğu mastûr bulunmağın müteveffâ-yı mezbûrun muhallefâtından mahmiye-i mezbûrede Çokalca mahallesinde vâki‘ mülk menziline vâzı‘atü’l-yed olan ( ) nâm hâtun meclis-i şer‘-i şerîfde olan şühûd-ı tarîkden el-Hâc Ali Bey b. İsmail ve el-Hâc Hasan Ağa b. Ahmed Bey nâm kimesneler li-ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ kitâb-ı mezbûr mevlânâ-yı müşârun-ileyhindir huzûrumuzda imzâlayıp ve hatemini urup biz bu husûsa şâhid eyledi biz bu husûsa şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de ri‘âyeti merâsimi’l-kabûl şehâdetleri hayyiz-i kabûlde vâkı‘a olundukdan sonra mezbûr Yusuf’un verasetine hüküm birle mâ-vaka‘a gıbbe’t-taleb ketb olundu. Tahrîren [fi’l-]yevmi’s-sâmin min şehri Ramazâni’l-mübârek li-sene semân ve sittîn ve elf. Şühûdü’l-hâl: Ahmed Bey b. Abdullah, İshak Beşe b. Ali, Mehmed b. Hasan, Oruc b. Ali, Dilaver b. Abdullah ve gayruhüm.