Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 672 Hüküm no: 717 Orijinal metin no: [110a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Paşa ile Mehmed Bey b. Hüseyin Şah’ın aralarında her hangi bir anlaşmazlık olmadığını ikrar ettikleri Vilâyet-i Rumeli’nden Delvine sancağında vâki‘ Aydonat kasabası sükkânından olup bundan akdem Niğde Sancağı beyi olup emîrü’l-ümerâ’i’l-kirâm Piko demekle ma‘rûf olan Ali Paşa tarafından husûs-ı âti’l-beyânı ikrâra vekîl olup Boyacı İbrahim Çavuş b. Mehmed ve Hasan Ağa b. Şa‘ban nâm kimesneler şehâdetleriyle şer‘an vekâleti sâbite olan iftihârü’l-ümerâ’i’l-kirâm sâbıkā Eğre [beyler]beyisi Mehmed Paşa meclis-i şer‘-i hatîr-i lâzimü’t-tevkīrde sâlifü’z-zikr kasaba sükkânından işbu râfi‘ü’l-kitâb Mehmed Bey b. Hüseyin Şah mahzarında bi’l-vekâle ikrâr ve takrîr-i kelâm edip müvekkilim müşârun-ileyh Ali Paşa ile mezbûr Mehmed Bey’in mâ-beynlerinde olan mu‘âmelât babaları ve cedleri zamanında olan hukūka müte‘allik ba‘de’l-yevm da‘vâ ve nizâ‘ları olmayıp ehadühümâ âharın zimmetini ibrâ-i âm ile ibrâ ve ıskāt etdiler eğer mazmûn-ı kitâba muhâlif ehadühümâdan âhar üzerine da‘vâ ve nizâ‘ sâdır olursa lede’l-hükkâmi’l-kirâm mesmû‘a olmaya dedikde vekîl-i müşârun-ileyhin vech-i muharrer üzere cârî olan ikrârı el-mukarru lehü’l-mezbûr Mehmed Bey vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min şehri Ramazâni’l-mübârek li-sene semân ve sittîn ve elf. Şühûdü’l-hâl: Umdetü’l-ümerâ’i’l-kirâm Ali Paşa b. Ömer, İbrahim Çavuş b. Mehmed, Ahmed Bey b. Oruc, Derviş Çelebi şâtır-ı Mehmed, Şâtır Mustafa, Hasan Ağa b. Şaban, Mehmed Ağa [b.] Hüseyin.