Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 54 Hüküm no: 41 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in tüfeğiyle kendini yaraladığının tespit olunduğu Medîne-i Üsküdar’a muzâfe Adalar nâhiyesine tâbi‘ Pendik nâm karyede bekârân tâifesi dâ‘îleri Murtaza ve Hasan b. İbrahim Çakır b. Mehmed ve Cafer b. Mehmed ve Hüseyin b. Veli ve karye-i mezbûre ahâlîlerinden Hırlaskari ve Foti, Aci Lihani ve Eril? ve Dimitri, Aci Londari, Uskulye, Dilberoğlu Dimitri ve Yorgaki ve Frankoli, Yamandi ve Todoraki nâm zimmîler bi-ecma‘ihim meclis-i şer‘a gelüp her birleri takrîr-i kelâm edüp fi’l-asl Anadolu’dan olup karye-i mezbûrede rençberlik vechi üzere sâkin olan Ahıskalı Mehmed nâm kimesne karye-i mezbûrede Macaroğlu odası önünde tarîk-i âmda ale’s-sabâh kendü tüfengine nizâm verir iken bi-kazâ-i te‘âlâ tüfeng boşanıp kendünü mecrûh eyledi üzerlerine [üzerine] varılıp keşfolunmasını taleb ederiz dediklerinde bi-nefsihi bu fakīr zeyl-i vesîkada muharrerü’l-esâmi kimesneler ile üzerine varılıp eser-i cerh tefahhus olundukda sol kolunda kurşun yarası rü’yet ve müşâhede olunup mecrûh-ı merkūmdan cârihi suâl olundukda bi-kazâillâhi te‘âlâ mahâll-i mezkûrda kendü tüfengime nizâm verir iken tüfeng boşanıp kendü kendümü mecrûh eyledim dem ü diyetime müte‘allık kimesne ile da‘vâ ve nizâ‘ım yokdur dediğini mahâllinde ketb ü tahrîr olunmağın mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-şehri Rebî‘i’l-evvel li-sene tis‘a ve seb‘în ve mi’ete ve elf. Şuhûdü’l-hâl: el-Hâc Ahmed oğlu Mehmed, İbrahim Beşe b. Ali, Na‘lband Halil b. Mehmed, Zilelioğlu Muharrem, Yazıcı Mehmed Efendi, Hasan Usta b. Abdullah, Tokatlı Hüseyin.