Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 678 Hüküm no: 724 Orijinal metin no: [111a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Köstenceli Rastobeta’nın kocası Petro’yu vurarak öldürdüğü iddiasıyla Zülfikar Ağa b. Abdülmennan aleyhine açtığı davada iki bin akçe üzerine sulh olduğu Samaku kazâsı muzâfâtından Köstence nâm karyede sâkin olan Rastobeta bt. ( ) nâm zimmiyye meclis-i şer‘-i hatîr-i lâzimü’t-tevkīrde kazâ-i mezbûr nâzırı ve cizyesi cem‘ine me’mûr olan işbu râfi‘ü’l-kitâb fahrü’l-akrân Zülfikar Ağa b. Abdülmennan mahzarında ikrâr ve takrîr-i kelâm edip zevcim olup bundan akdem hâlik olan Petro v. Olova nâm zimmîyi mezbûr Zülfikar Ağa darbla urup helâk oldu deyu da‘vâ ve taleb edip ol dahi inkâr edip mâ-beynimize Müslimûn ve muslihûn tavassut etmeğin mezbûr Petro’nun helâkine müte‘allik da‘vâdan beni iki bin akçe üzerine sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mersûm iki bin [akçeyi] mezbûrun yedinden tamâmen ahz u kabz edip ba‘de’l-yevm mezbûr Zülfikar Ağa’nın zimmetini zevcim mezbûr Petro da‘vâsından ibrâ-i âmla ibrâ ve ıskāt ettim mazmûn-ı kitâba muhâlif benden bi’l-asâle ve’l-vekâle da‘vâ sâdır olursa lede’l-hükkâmi’l-kirâm mesmû‘a olmaya dedikde mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî ve’l-ışrîn min şehri Ramazâni’l-mübârek li-sene semân ve sittîn ve elf. Şühûdü’l-hâl: Bayram Beşe çukadâr, Hasan b. Ali, Satılmış Beşe b. Veli, Haydar b. Memi ve gayruhüm.