Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 679 Hüküm no: 725 Orijinal metin no: [111a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Ali’nin boşandığı kocası Ali Beşe b. Mustafa aleyhine açtığı mehir ve nafaka davasında haksız olduğu Mahmiye-i Edirne mahallâtından Âişe bt. Hâtun mahallesi sâkinelerinden Havvâ bt. Ali nâm hâtun meclis-i şer‘-i hatîr-i lâzimü’t-tevkīrde bâ‘isü’l-kitâb bundan akdem zevci olan Ali Beşe b. Mustafa nâm kimesne mahzarında takrîr-i da‘vâ edip mezbûr Ali Beşe beni tatlîk etdikde zimmetinde dört bin akçe mütekarrir olan mehr-i müeccelim ve nafaka-i iddet ve meûnet-i süknâm olup hâlâ vermekde te‘allül eder suâl olunup alıverilmesi matlûbumdur dedikde gıbbe’s-suâl mezbûr Ali Beşe cevâbında mezbûre Havvâ bundan akdem zevcem idi lâkin meblağ-ı mezbûr dört bin akçe mehr-i müeccel ve nafaka-i iddeti ve meûnet-i süknâsı üzerine hul‘ olup zevciyyete müte‘allika zimmetimi ibrâ ve ıskāt etdi dedikde gıbbe’l-inkâr mezbûr Ali Beşe müdde‘âsını mübeyyine beyyine taleb olundukda udûl-i ricâlden Nurullah Efendi b. Hasan Efendi ve Mehmed Beşe b. Ali nâm kimesneler li-ecli’ş-şehâde meclis-i şer‘a hâzırân olup istişhâd oldukda fi’l-vâki‘ mezbûre Havvâ mezbûr Ali Beşe zimmetinde mütekarrir olan dört bin akçe mehr-i müeccelini ve nafaka-i iddetini ve meûnet-i süknâsını fâriğa olup muhâla‘a olmak üzere mezbûr Ali Beşe ile muhâla‘a-i şer‘iyye edip ehadühümâ âharın zimmetini ibrâ ve ıskāt etdi biz bu husûsa şâhidiz şehâdet dahi ederiz dediklerinde edâ-i şehâdet-i şer‘iyye ettiklerinde ba‘de ri‘âyeti’ş-şerâiti’l-kabûl şehâdetleri hayyiz-i kabûlde vâkı‘a oldukdan sonra mu‘ârazadan men‘ birle mâ-vaka‘a bi’t-taleb ketb olundu. Tahrîren fi’l-yevmi’s-sâlis ve’l-ışrîn min şehri Ramazâni’l-mübârek li-sene semân ve sittîn ve elf. Şühûdü’l-hâl: Ahmed Beşe b. Ali, Bayram Beşe çukadâr, Hasan b. Ali, Dilaver b. Abdullah ve gayruhüm.