Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 679 Hüküm no: 726 Orijinal metin no: [111b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş b. Oruç’un kendisini kesici aletle yarayan Ahmed Bey b. Hüseyin ile beş bin akçe üzerine sulh olduğu Mahmiye-i İstanbul’da sâkin Derviş b. Oruc nâm kimesne meclis-i şer‘-i hatîr-i lâzimü’t-tevkīrde nefs-i Zağra-i Cedîd’de sâkin Ahmed Bey b. Hüseyin tarafından ikrâr-ı âti’l-beyânı tasdîka vekîl olup bi-mâ-hüve nehcü’s-sübût şer‘an vekâleti sâbite olan iftihârü’l-emâcid ve’l-a‘yân Süleyman Bey b. el-merhûm Receb Paşa mahzarında ikrâr ve takrîr-i kelâm edip bundan esbak mezbûr Ahmed Bey sağ elimin orta parmağını âlet-i câriha ile mecrûh edip ben dahi da‘vâ ve isbât sadedinde iken mâ-beynimize Müslimûn-ı muslihûn tavassut edip an-inkâr beni husûs-ı mezbûra müte‘allika da‘vâdan beş bin akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru meclis-i sulhda ahz u kabz edip ba‘de’l-yevm husûs-ı mezbûra müte‘allika da‘vâdan zimmetini ibrâ-i âm ile ibrâ ve ıskāt edip min ba‘d bi’l-asâle ve bi’l-vekâle mezbûr Ahmed Bey üzerine benden da‘vâ sâdıra olursa lede’l-hükkâmi’l-kirâm mesmû‘a olmaya dedikde gıbbe’t-tasdîk mâ-hüve’l-vâki‘ gıbbe’t-taleb ketb olundu. Hurrire fi’l-yevmi’s-sâdis ve’l-ışrîn min şehri Ramazâni’l-mübârek li-sene semân ve sittîn ve elf. Şühûdü’l-hâl: Fahrü’l-müderrisîn Mehmed Efendi b. Ömer Efendi, Mustafa Çelebi b. Abdülmennân, diğer Mustafa Ağa b. Derviş Abdullah, Fahrü’l-kuzât Ali Efendi b. Mustafa, Fahrü’l-cüyûş Mahmud Çavuş b. Hüseyin, Mehmed Bey b. Abdullah el-cündi ve gayruhüm mine’l-huzzâr.