Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 680 Hüküm no: 727 Orijinal metin no: [111b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Süleyman’ın mehir, nafaka ve bazı eşyasıyla alakalı olarak eski kocası Osman b. Abdullah aleyhine açtığı davada sulh olduğu Mahmiye-i Edirne’ye tâbi‘ Akpınar nâm karye sâkinelerinden Fâtıma bt. Süleyman nâm hâtun meclis-i şer‘-i hatîr-i lâzimü’t-tevkīrde zevc-i sâbıkı Osman b. Abdullah mahzarında ikrâr ve takrîr-i kelâm edip mezbûr Osman bundan akdem beni tatlîk etmekle zimmetinde mütekarrir olan bin akçe mehr-i müeccelim ve nafaka-i iddet-i ma‘lûmem ve meûnet-i süknâ-yı mu‘ayyenem ve bir neftî mahrûr alaca yorgan ve bir beledî döşek ve bir mâ’î alaca kaftan taleb ve da‘vâ ettiğimizde beynimize muslihûn tavassut edip beni eşyâ-i mezkûremden fâriğa olmak üzere dört yüz nakd-i râyic fi’l-vakt akçe üzerine sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûru’n-na‘tı merkūm Osman Ağa’nın yedinden tamâmen ahz u kabz edip zimmetini hukūk-ı zevciyyete müte‘allika cemî‘ de‘âvîden ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fî evâhiri şehri Ramazân li-sene semân ve sittîn ve elf. Şühûdü’l-hâl: El-hâc Hamdi b. Abdullah, Ahmed b. Maden, İbrahim b. Abdullah, İlyas Dede b. Sinan, Mustafa b. Mehmed ve gayruhüm.