Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 680 Hüküm no: 728 Orijinal metin no: [112a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Mustafa’nın merhum Abdi Paşa’daki alacağına kefaletinden dolayı Hasan Bey b. İbrahim aleyhine açtığı davada iki yüz on guruşa sulh olduğu Mahmiye-i İstanbul’da merhûm Koca Mustafa Paşa mahallesi sükkânından Ahmed Bey b. Mustafa nâm kimesne meclis-i şer‘-i şerîf-i refi‘ü’l-erkân ve mahfil-i dîn-i münîf-i râsihu’l-bünyânda işbu râfi‘ü’l-kitâb Hasan Bey b. İbrahim mahzarında tav‘an ikrâr ve takrîr-i kelâm edip bundan akdem medîne-i Edirne’de maktûlen müteveffâ olan merhûm Abdi Paşa zimmetinde cihet-i deyn-i şer‘îden dört yüz on kıt‘a riyâlî guruş hakkım olup meblağ-ı mezbûr dört yüz on kıt‘a guruşa mezbûr Hasan Bey emr [ve] kabûlü hâvî kefâlet-i sahîha-i şer‘iyye ile kefîl olmuşdu hâlâ meblağ-ı mezbûru müteveffâ-yı merkūm Abdi Paşa’dan hâl-i hayâtında ve ba‘de vefâtihî tereke-i vâfiyyesinden ahz [ve] istîfâ etmediğim ecilden meblağ-ı mezbûru mezbûr Hasan Bey’den kefâlet hasebiyle da‘vâ ve taleb ettiğimde mâ-beynimizde münâza‘ât-ı kesîre vâki‘ olmuşdu el-hâletü hâzihî Müslimûn-ı muslihûn tavassutu ile beni iki yüz on aded esedî guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mersûm iki yüz on aded esedî guruşu yedinden tamâmen ahz u kabz edip ba‘de’l-yevm mezbûr Hasan Bey’in zimmetini meblağ-ı mezbûrdan ibrâ-i âm ile ibrâ ve ıskāt ettim eğer benden bi’l-asâle ve bi’l-vekâle meblağ-ı mezbûra müte‘allika da‘vâ ve nizâ‘ sâdıre olur ise lede’l-hükkâmi’l-kirâm mesmû‘a ve makbûle olmaya dedikde mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ min şehri Şevvâli’l-mükerrem li-sene semân ve sittîn ve elf. Şühûdü’l-hâl: Süleyman Ağa, el-Hâc Ebûbekir b. Abdullah, Ali Bey, Mehmed Bey b. Bayram, Yusuf Ağa el-bevvâbü’s-sultânî, Hasan Ağa, Hasan Ağa âh-i Abdi Paşa, Ahmed Ağa âh-i [Abdi] Paşa.