Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 682 Hüküm no: 730 Orijinal metin no: [112a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hasan Çelebi b. Mustafa’nın merhum Abdi Paşa’daki alacağına kefaletinden dolayı Hasan Bey b. İbrahim aleyhine açtığı davada beş yüz elli guruşa sulh olduğu Mahmiye-i İstanbul’da vâki‘ Gül Câmi‘-i Şerifi mahallesi sükkânından fahrü’s-sâde mecma‘u’s-siyâde es-Seyyid Hasan Çelebi b. Mustafa meclis-i şer‘de râfi‘ü’l-kitâb Hasan Bey b. İbrahim mahzarında tav‘an ikrâr ve takrîr-i kelâm edip bundan akdem medîne-i Edirne’de maktûlen müteveffâ olan merhûm Abdi Paşa zimmetinde cihet-i deyn-i şer‘îden kâmil bin kıt‘a esedî guruş hakkım olup meblağ-ı mezbûr bin kıt‘a esedî guruşa mezbûr Hasan Bey emr ve kabûlü hâviye kefâlet-i sahîha-i şer‘iyye ile kefîl olmuşidi hâlâ meblağ-ı mezbûru müteveffâ-yı merkūm Abdi Paşa dahi hâl-i hayâtında ve ba‘de vefâtihî tereke-i vâfiyyesinden ahz ve istîfâ etmediğim ecilden meblağ-ı mezbûru kefîl-i mersûm Hasan Bey’den da‘vâ ve taleb ettiğimde mâ-beynimizde münâza‘ât-ı kesîre vâkı‘a olmuşidi el-hâletü hâzihî Müslimûn ve muslihûn tavassut ile beni beş yüz elli guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr beş yüz elli aded esedî guruşu mezbûr Hasan Bey yedinden alıp kabz edip min ba‘d meblağ-ı mezbûr bin kıt‘a esedî guruşa müte‘allika mezbûr ile da‘vâ ve nizâ‘ım kalmayıp meblağ-ı mezbûrdan zimmetini ibrâ-i âm ile ibrâ ve ıskāt ettim ba‘de’l-yevm bi’l-asâle ve’l-vekâle benden mezbûr Hasan Bey’in üzerine da‘vâ sâdıre olursa lede’l-hükkâmi’l-kirâm mesmû‘a olmaya dedikde mâ-hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ min-Şevvâli’l-mükerrem li-sene semân ve sittîn ve elf. Şühûdü’l-hâl: Süleyman Ağa mîr-alay-ı İnebahtı, el-Hâc Ebûbekir b. Abdullah, Ali Bey, Mehmed Beş b. Bayram el-yesârî, Yusuf Ağa b. ( ) el-bevvâbü’s-sultânî, Hasan Ağa Ustazâde, Hasan Ağa âh-i Abdi Paşa, Ahmed Ağa âh-i Abdi Paşa.