Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 682 Hüküm no: 731 Orijinal metin no: [112a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bey b. İbrahim’in aldığı borç karşılığında rehin verdiği eşyaları satıp alacağını tahsil etmek üzere Hacı Ebubekir Ağa b. Abdullah’ı vekil tayin ettiği Ayamavra sancağında vâki‘ İvla[ho]hor kazâsı sükkânından Hasan Bey b. İbrahim nâm kimesne meclis-i şer‘-i şerîf-i lâzimü’t-teşrîfde râfi‘ü’l-kitâb el-Hâc Ebûbekir Ağa b. Abdullah mahzarında ikrâr ve takrîr-i kelâm edip hâlâ mezbûr Ebûbekir Ağa bana yedi yüz altmış aded esedî guruş ikrâz edip ben dahi istikrâz ve tesellüm edip mukābilesinde bir mukaffel sepet sandığı içinde iki yüz aded tamâm esedî guruş ile bir yeşil çukaya kaplı semmûr paçası kürk ve zeytûnî çukaya kaplı bir zerdevâ paçası kürk ve bir benefş çuka kerrâke ile iki sîm raht ve üç aded sîm reşme ile on aded Humus makramesi ve sâir hurde eşyâmı mezbûr el-Hâc Ebûbekir Ağa’ya rehin vaz‘ edip ol dahi irtihân ve kabûl ve kabz etmişidi hâlâ mârrü’z-zikr eşyâ-i mezkûre semen-i misli ile bey‘ olunup deynime takās ve ziyâdesi yedinde emânet olmak için tarafımdan mezbûr el-Hâc Ebûbekir Ağa’yı vekâlet-i mezbûre ile vekîl edip ol dahi vekâlet-i mezbûreyi kabûl ve hizmet-i lâzımesini edâya müte‘ahhid olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâdis min-Şevvâli’l-mükerrem li-sene semân ve sittîn ve elf. Şühûdü’l-hâl: Süleyman Ağa b. ( ) mîr-livâ-i İnebahtı, Ali Bey, Mehmed Bey b. Bayram, Yusuf Bey b. Abdullah el-bevvâbü’s-sultânî, Hasan Ağa b. Ustazâde, Hüseyin Ağa b. ( ) âh-i Abdi Paşa, Ahmed Ağa b. ( ) âh-i Abdi Paşa, Sinan Bey b. Bekir ve gayruhüm.