Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 683 Hüküm no: 732 Orijinal metin no: [112b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı İbrahim Efendi’nin kefaletinden dolayı Saruhan Sancağı Mutasarrıfı Hüseyin Paşa aleyhine açtığı alacak davasında sulh olduğu Vilâyet-i Anadolu’da Saruhan sancağında Borlu kasabası sükkânından İbrahim Efendi b. Mehmed el-Kādî meclis-i şer‘-i şerîf-i şâmihu’l-imâd ve mahfil-i dîn-i münîf-i râsihu’l-erkânda sâbıkā sancağ-ı mezbûra ber-vech-i arpalık mutasarrıf olan emîrü’l-ümerâ’i’l-kirâm sâhibü’l-izzi ve’l-ihtişâm Hüseyin Paşa tarafından ikrâr-ı âti’l-beyânı tasdîka vekîl olup bi-mâ-hüve nehcü’ş-şer‘î vekâleti sâbite olan râfi‘ü’l-kitâb Zülfikar Ağa mahzarında ikrâr ve takrîr-i kelâm edip paşa-yı müşârun-ileyh mârrü’z-zikr sancağa mutasarrıf iken taraflarından Mustafa Ağa nâm kimesne gelip karye-i [kasaba-i] mezbûrede beni ahz edip yedimden bi-gayri vech-i şer‘î iki yüz yirmi iki buçuk guruşumu alıp kabz etmekle hâlâ ben dahi paşa-yı müşârun-ileyhin olduğu mahalle varıp mezbûr Mustafa[’yı] tecessüs ve tefahhus ve hakīkat-i hâli kendilere i‘lâm eylediğimde yabana gitdi kendi hizmetimdedir beş altı gün mikdâr sabr eyle gelmezse taleb ettiğin meblağ-ı mezbûra ben dâmin olayım deyu kefîl olup mezbûr Mustafa Ağa eyyâm-ı mezbûrede gelmemekle kefâlet-i merkūmeyi isbât ve yedime hüccet-i şer‘iyye alıp meblağ-ı mezbûru paşa-yı müşârun-ileyhden da‘vâ ve taleb ettiğimde mâ-beynimize muslihûn ve Müslimûn tavassut etmekle meblağ-ı mezbûrdan beni on beş aded altın ve otuz aded riyâlî guruş ve bir siyah bârgir ve bir mücevher tüfenk ve bir sîm kılıç üzerine sulh eylediklerinde ben dahi sulh-ı mezbûru kabûl ve bedel-i sulh olan eşyâ-i merkūmeyi alıp kabz edip ba‘de’l-yevm meblağ-ı mezbûr iki yüz yirmi iki buçuk guruş da‘vâsından paşa-yı mûmâ-ileyh zimmetini ibrâ-i âm ile ibrâ ve ıskāt ettim eğer mazmûn-ı kitâba muhâlif paşa-yı müşârun-ileyh üzerine benden da‘vâ sâdır olursa lede’l-hükkâmi’l-kirâm mesmû‘a olmaya dedikde mâ-hüve’l-vâki‘ gıbbe’t-taleb ketb olundu. Tahrîren fi’l-yevmi’r-râbi‘ min-Şevvâli’l-mükerrem li-sene semân ve sittîn ve elf. Şühûdü’l-hâl: Ahmed Ağa doğancı, Abaza İbrahim Ağab. Abdi, Ahmed Ağa kethüdâ, Hasan b. Ali, el-Hâc İbrahim Ağa b. Hızır ve gayruhüm.