Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 684 Hüküm no: 733 Orijinal metin no: [112b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Konevî Mehmed Efendi’nin vasiyeti üzere terekesinden hizmetkarları Derviş b. Ömer ve Hüseyin b. Abdullah’a ellişer guruş verilmesi Mahmiye-i Edirne’de bundan akdem müteveffâ olan Konevî Mehmed Efendi’nin kadîmden hizmetinde olan râfi‘ayi’l-kitâb Derviş b. Ömer ve Hüseyin b. Abdullah nâm kimesneler meclis-i şer‘-i şerîf-i lâzimü’t-teşrîfde müteveffâ-yı mezbûrun techîz ve tekfînine ve sâir vesâyâ-yı mu‘ayyenesini tenfîze vasiyy-i muhtârı olan umdetü’l-ulemâ ve’l-müderrisîn Hâfız Mehmed Efendi mahzarında herbiri da‘vâ ve takrîr-i kelâm edip efendimiz müteveffâ-yı merkūm Konevî Mehmed Efendi vefâtından üç gün mukaddem tasarrufât-ı şer‘iyyesini nâfize olduğu hâlde her birimize sülüs mâlından ellişer kıt‘a guruş vasiyet edip ve sülüsü dahi müsâ‘id olmağla ber-mûceb-i vasiyet-i mezbûre mârrü’z-zikr ellişer kıt‘a guruşumuzu taleb ederiz dediklerinde gıbbe’s-suâl mûmâ-ileyh Hâfız Mehmed Efendi cevâbında siz müteveffâ-yı mezbûrun kadîmden hizmetinde olup hîn-i mevtine değin hizmetinden müfârakat etmediğiniz ma‘lûmum olup lâkin her birinize zikrolunan ellişer guruşu vasiyeti olduğu ma‘lûmum değildir dedikde müdde‘iyân-ı mezbûrândan müdde‘âlarını mübeyyine beyyine taleb olundukda udûl-i Müslimîn ve sikāt-ı muvahhidînden iftihârü’l-ulemâ’i’l-müderrisîn zübdetü’l-fuzalâ’i’l-müdakkıkīn hâlâ fetvâ emîni olan Mustafa Efendi b. Nurullah ve zahrü’l-müderrisîni’l-kirâm Mehmed Efendi nâm kimesneler li-ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ müteveffâ-yı mezbûr Konevî Mehmed Efendi mevtinden üç gün mukaddem tasarrufât-ı şer‘iyyesini nâfize olduğu hâlde hizmetkârları merkūmân Derviş’e ve Hüseyin’e sülüs malından ellişer guruş verile deyu bizim huzûrumuzda vasiyet edi bizi işhâd etdi biz bu husûsa şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra mûcibiyle hüküm birle mâ-vaka‘a gıbbe’t-taleb ketb olundu. Tahrîren fi’l-yevmi’l-hâmis ve’l-ışrîn min-Şa‘bâni’l-mu‘azzam li-sene semân ve sittîn ve elf. Şühûdü’l-hâl: Fahrü’l-müderrisîn İbrahim Efendi b. Halil, diğer İbrahim Efendi b. Hızır Efendi, Fahrü’l-a‘yân İbrahim Ağa, Umdetü’l-a‘yân Ahmed Ağa, Mehmed Efendi b. Ömer ve gayruhüm mine’l-huzzâr.