Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 689 Hüküm no: 740 Orijinal metin no: [113b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Yedekçi Himmet b. Mehmed terekesinin varisleri olan kardeşi oğlu Mahmud ve kızı Raziye tarafından teslim alındığı Vilâyet-i Anadolu’da Amasya sancağında Zeytun kazâsına tâbi‘ olan Zeytun nâm karye sâkinlerinden olup Istabl-ı âmireme yedekçi iken fevt olan Himmet b. Mehmed nâm kimesne[nin] li-ebeveyn karındaşı oğlu Mahmud ve kızı Râziye nâm sagīrlerin tesviye-i umûrlarına kıbel-i şer‘den mansûb vasîleri olan Abdullah Ağa b. Emrullah nâm kimesne mahmiye-i Edirne’de meclis-i şer‘-i hatîr-i lâzimü’t-tevkīrde zikrolunan Istabl-ı âmire’de başyedekçi olup müteveffâ-yı mezbûrun muhallefâtına vâzı‘u’l-yed olan Mustafa Ağa b. Abdullah nâm kimesne tarafından ikrâr-ı âti’l-beyânı tasdîka vekîl olup nehc-i şer‘î üzere vekâleti sâbite olan Hüseyin Ağa b. Musa mahzarında ikrâr ve takrîr-i kelâm edip müvekkil-i mezbûr müteveffâ-yı mezbûrun zâhirde vâris-i ma‘rûfu olmamağla hîn-i vefâtında yanında mevcûd olup nukūd ve sâir muhallefâtı kırk altı bin altı yüz kırk akçeye bâliğ olup emâneten meblağ-ı mezbûru ahz u kabz eylemişidi hâlâ müteveffâ-yı mezbûrun min ciheti’l-usûbeti’n-nesebiyye bi’l-inhisâr vârisi olan sagīrân-ı mezbûrânın vasîleri olduğum hasebiyle meblağ-ı mezbûr kırk altı bin altı yüz kırk akçe mezkûr Mustafa Ağa yedinden vesâyetim hasebiyle ahz u kabz eyleyip mezbûr Mustafa Ağa’nın zimmetini muhallefât-ı müteveffâ-yı mezbûre müte‘allik da‘vâdan ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ min-Şevvâli’l-mükerrem li-sene semân ve sittîn ve elf. Şühûdü’l-hâl: Mehmed b. Hasan sarac, Mehmed b. Halil sarac, Mehmed b. Ca‘fer sarac, Mehmed b. Kalender hazînedar, Ali b. Mehmed sarac, Hüseyin kethüdâyeri.