Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 690 Hüküm no: 742 Orijinal metin no: [114a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi’nin ölen kardeşi Petre’den kendilerine intikal eden bağ ve odayla ilgili hisse ve mülkiyet davasında yeğeni Todori’nin zimmetini ibra ettiği Mahmiye-i Edirne’ye tâbi‘ Kali nâm karyede sâkin Yorgi v. ( ) nâm zimmî meclis-i şer‘de işbu bâ‘isü’l-kitâb Todori bt. Petre nâm Nasrâniye muvâcehesinde ikrâr-ı tâm ve takrîr-i kelâm edip mezbûre Todori’nin mülkü olup karye-i mezbûre hudûdunda bir tarafdan İstayko nâm zimmî bağı ve bir tarafdan Veziroğlu demekle ma‘rûf zimmî bağı ve bir tarafdan Piyo nâm zimmî bağı ve bir tarafdan Dimitri v. Nikola bağı ile mahdûd tahmînen bir dönüm bağ li-ebeveyn karındaşım olup mezbûre Todori’nin babası merkūm Petre mürd olmağla verâseti ikimize münhasıra olmağın mülk-i mevrûsumdur deyu nısf hisse da‘vâsında ve mülk-i müşterâmdır deyu mülkiyet da‘vâsında mezbûre Todori’nin zimmetin ibrâ-i âm ile ibrâ ve ıskāt eylediğimden mâ‘adâ karye-i mezbûrede lede’l-ahâlî ve’l-cîrân ma‘lûmü’l-hudûd olup mezbûrenin mülkü olan bir saman pûşîde oda dahi vechen mine’l-vücûh ve sebeben mine’l-esbâb alâka ve medhalim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Şevvâli’l-mükerrem li-sene semân ve sittîn ve elf. Şühûdü’l-hâl: Mehmed Çavuş el-mübâşir, İsa Bey [b.] Ahmed, Süleyman Bey ve gayruhüm.