Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 693 Hüküm no: 745 Orijinal metin no: [114b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Abdullah’ın merhum Ali Çelebi b. Musa’da olan alacağının merhumun varisi Sâliha tarafından terekesinden ödenmesi Mahmiye-i İstanbul’da Çukurbostan kurbünde sâkin olup hâlâ mahrûse-i Edirne’de iken Ciğerkapısı kurbünde sâkin işbu sâhibü’l-kitâb fahrü’l-akrân Mehmed Ağa b. Abdullah nâm kimesne mahrûse-i mezbûrede meclis-i şer‘de Sâliha bt. Mustafa nâm hâtun mahzarında üzerine da‘vâ ve takrîr-i kelâm edip mahrûse-i mezbûrede Hasan Paşa mahallesi sâkinlerinden olup ticâret tarîkiyle medîne-i Filibe’de müsâfir iken bundan akdem vefât eden Ali Çelebi b. Musa târih-i kitâbdan dokuz sene mukaddem mahmiye-i mezbûrede sâkin olduğum menzilimde yüz elli bin fıddî râyic fi’l-vakt akçe malımdan ikrâz ve teslîm edip ol dahi istikrâz ve kabz eyleyip kable’l-îfâ fevt olmağla meblağ-ı mezkûr zimmetinde kalmağın hâlâ mezbûre Sâliha müteveffâ-yı mezbûrun li-üm kız karındaşı ve vârisesi olup muhallefâtına vâzı‘atü’l-yed olmağın meblağ-ı mezkûru tereke-i vâfiyyesinden taleb ederim suâl olunup alıverilmek matlûbumdur dedikde gıbbe’s-suâl mezbûre Sâliha cevâbında muhallefât-ı müteveffâ-yı merkūma vaz‘-ı yedini ikrâr ve deyn-i mezkûru bi’l-külliyye inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-ı ahrâr-ı ricâl-i Müslimînden Mehmed Bey b. Hüseyin ve Mustafa Bey b. Bayezid nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı mezbûr Ali Çelebi hayâtında târih-i kitâbdan dokuz sene mukaddem müdde‘î-i mezbûrun menzilinde bizim huzûrumuzda müdde‘î-i mezkûr Mehmed Ağa’nın yedinden ve mâlından yüz elli bin fıddî râyic fi’l-vakt akçe istikrâz ve kabz eyledi biz bu husûsa bu vech üzere şâhidleriz şehâdet dahi ederiz deyu her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle oldukdan sonra mezbûr Mehmed Ağa meblağ-ı merkūm yüz elli bin akçeyi müteveffâ-yı mezbûrun hayâtında yedinden ahz u kabz veyâ havâle etmeyip turuk-ı şer‘iyyeden bir tarîkle zimmetini ibrâ etmediğine yemîn teklîf olundukda yemîn billâhi’l-azîm etmeğin mûcibiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâdis aşer min-Şevvâli’l-mükerrem li-sene semân ve sittîn ve elf. Şühûdü’l-hâl: Fahrü’l-müderrisîn Mehmed Efendi, Fahrü’l-kuzât Ali Efendi el-kādî, Fahrü’l-kuzât Mehmed Efendi el-kādî, İsa Bey b. Ahmed ve gayruhüm.