Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 693 Hüküm no: 746 Orijinal metin no: [114b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa b. Ali’nin Baryam v. Salamon’dan bir kese guruş ve iki kese akçe alacağı olduğu Efendi hazretleri huzûrunda olmuşdur. Merhûm Fazlullah Paşa’nın hazînedârı olan işbu sâhibü’l-kitâb fahrü’l-akrân Süleyman Ağa b. Ali nâm kimesne mahmiye-i Edirne’de meclis-i şer‘de Baryam v. Salamon nâm Yahudi muvâcehesinde üzerine da‘vâ ve takrîr-i kelâm edip işbu târih-i kitâb Ramazân-ı şerîfinin yedinci günü beher kîsesi kırk beşer bin akçe olmak üzere bî-tarîkı’l-emâne meşîn kîse ile merkūm Baryam yedine ba‘de’l-ad mahtûm bir kîse guruş ve iki kîse akçe def‘ ve teslîm edip ol dahi ahz u kabz eylemişidi hâlâ taleb eylediğimde vermede te‘allül eder suâl olunup alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ricâl-i Müslimînden Süleyman b. Abdullah nâm kimesne meclis-i şer‘a li-ecli’ş-şehâde hâzır olup isre’l-istişhâd fi’l-vâki‘ müdde‘î-i mezbûr Süleyman Ağa işbu târih-i kitâb Ramazân-ı şerîfi’nin yedinci günü beher kîse kırk beşer bin akçe olmak üzere bî-tarîkı’l-emâne meşîn kîse ile benim huzûrumda merkūm Baryam yedine ba‘de’l-ad mahtûm bir kîse guruş ve iki kîse akçe def‘ ve teslîm edip ol dahi ahz u kabz eyledi ben bu husûsa bu vech üzere şâhidim şehâdet dahi ederim deyu edâ-i şehâdet-i şer‘iyye ettikden sonra yine udûl-i ricâlden İskender b. Hızır ve Mustafa Bey b. Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında kezâlik şâhid-i asl olan Ahmed Ağa b. Abdullah nâm kimesne sefere müteveccih olduğu hâlde mezbûr Süleyman Ağa işbu târih-i kitâb Ramazân-ı şerîfinin yedinci günü her kîsesi kırk beşer bin akçe olmak üzere bî-tarîkı’l-emâne meşîn kîse ile merkūm Baryam yedine benim huzûrumda ba‘de’l-ad mahtûm bir kîse guruş ve iki kîse akçe def‘ ve teslîm edip ol dahi ahz u kabz eyledi ben [bu] husûsa bu vech üzere şâhidim şehâdet dahi ederim hâlâ ben sefere müteveccih olmağla siz dahi benim lisânımdan şâhid olup şehâdet edin deyu şehâdetini bize tahmîl edip biz dahi merkūm Ahmed Ağa’nın lisânından bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle oldukdan sonra mûcibiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Şevvâli’l-mükerrem li-sene semân ve sittîn ve elf. Şühûdü’l-hâl: Şahin Çavuş b. Mahmud el-mübâşir, Ali Efendi el-kādî, Şâtırbaşı Ali Ağa, Arnavud Ali Ağa, Mustafa Çelebi b. Mehmed, Mehmed b. Mustafa kâtibü’l-hurûf ve gayruhüm.