Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 694 Hüküm no: 747 Orijinal metin no: [114b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ömer’in kocası merhum Zülüflü Ali Paşa’dan dört bin guruş mehir alacağı olduğunu şahitlerle ispat ettiği Ber-vech-i arpalık Vize sancağına mutasarrıf iken vefât eden Zülüflü Ali Paşa’nın zevcesi işbu sâhibetü’l-kitâb fahrü’l-muhadderât zahrü’l-muvakkarât Âişe bt. Ömer nâm hâtun mahmiye-i Edirne’de meclis-i şer‘de mahmiye-i mezbûrede beytü’l-mâl-ı âmme ve hâssa emîni olan fahrü’l-akrân Halil Ağa nâm kimesne mahzarında üzerine da‘vâ ve takrîr-i kelâm edip zevcim müteveffâ-yı mezbûr zimmetinde ma‘kūdün-aleyh dört bin riyâlî guruş mehr-i müeccelim olup müteveffâ-yı mezbûr hâl-i hayâtında ve kemâl-i sıhhatinde mirâren ve kirâren zimmetinde dört bin riyâlî guruş mehr-i müeccelim olduğunu huzûr-ı Müslimînde ikrâr dahi etmişdir hâlâ mezkûr Halil Ağa cümle tereke-i müteveffâ-yı mezbûre emâneti hasebiyle vaz‘-ı yed etmekle tereke-i müteveffâ-yı mezbûrdan mehr-i müeccelim olan meblağ-ı mezbûr dört bin riyâlî guruşu merkūm Halil Ağa’dan taleb ederim suâl olunup alıverilmek matlûbumdur dedikde gıbbe’s-suâl emîn-i mezkûr Halil Ağa cevâbında tereke-i müteveffâ-yı mezbûra vaz‘-ı yedini ikrâr ve vech-i muharrer üzere müteveffâ-yı mezbûr zimmetinde ma‘kūdün-aleyh dört bin riyâlî guruş mehr-i müecceli olduğunu inkâr edicek müdde‘iye-i mezbûreden müdde‘âsını mübeyyine beyyine taleb olundukda udûl-i ricâlden İbrahim Efendi b. Mustafa ve Sefer b. Zülfikar nâm kimesneler li-ecli’ş-şehâde meclis-i şer‘a hâzırân olup istişhâd olduklarında fi’l-hakīka müteveffâ-yı merkūm Ali Paşa hâl-i hayâtında ve kemâl-i sıhhatinde zevcem mezbûre Âişe’nin zimmetimde ma‘kūdün-aleyh mehr-i müecceli dört bin riyâlî guruşdur deyu ikrâr ve bizi işhâd eyledi biz bu husûsa şâhidleriz şehâdet dahi ederiz deyu herbiri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle oldukdan sonra mezbûre Âişe Hâtun müteveffâ-yı mezbûrun hayâtında mehr-i müecceli olan dört bin riyâlî guruş yedinden ahz u kabz veyâ hibe veyâ turuk-ı şer‘iyyeden bir tarîkle zimmetini ibrâ etmediğine yemîn teklîf olundukda ol dahi bi-hasebi’l-mes’ûl yemîn bi’llâh ettikden sonra mûcibiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Şevvâli’l-mükerrem li-sene semân ve sittîn ve elf. Şühûdü’l-hâl: Ali Efendi el-kādî, Mustafa Ağa, Mehmed Efendi el-kādî, Mehmed Efendi el-kādî, Mustafa Efendi el-kādî, Arslan Beşe.