Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 695 Hüküm no: 748 Orijinal metin no: [114b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Nikola ile Mehmed b. Abdullah’ın alacak verecek hususunda birbirlerinin zimmetlerini ibra ettikleri Mahmiye-i Edirne nevâhîsinden Üsküdar nâhiyesine tâbi‘ Pınarca nâm karyede sâkin Dimitri v. Nikola nâm zimmî meclis-i şer‘-i hatîr-i lâzimü’t-tevkīrde Mehmed b. Abdullah nâm kimesne mahzarında ikrâr-ı tâm ve takrîr-i kelâm edip mezbûr Mehmed’in zimmetinde edâsı lâzım dört yüz akçe hakkı olup ve benim dahi mezbûr Mehmed’in yedinde beş çit saman ve bir re’s karasığır ineği ve bir buzağı olmağla merkūm Mehmed zimmetinde olan meblağ-ı mezbûr beş yüz akçe da‘vâsından ve ben dahi zikrolunan beş çit saman ve bir re’s karasığır ineği ve bir buzağı da‘vâsından birbirimizin zimmetini ibrâ-i âm ile ibrâ ve ıskāt eyledik dedikde mukırr-ı mezbûrun vech-i meşrûh üzere cârî olan ikrârını merkūm Mehmed vicâhen ve şifâhen tasdîk edicek mâ-vaka‘a bi’t-taleb ketb olundu. Fi’l-yevmi’l-sâdis aşer min şehri Şevvâli’l-mükerrem li-sene semân ve sittîn ve elf. Şühûdü’l-hâl: Abdülkerim Efendi, İsa Bey [b.] Ahmed, Ca‘fer Bey b. Abdullah, Bayram Beşe çukadâr.