Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 696 Hüküm no: 750 Orijinal metin no: [115a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Abdullah’ın merhum Ali Çelebi’de olan yüz elli bin akçe alacağını merhumun kardeşi ve varisi Sâliha’dan alıp zimmetini ibra ettiği Mahmiye-i İstanbul’da Çukurbostan kurbünde sâkin olup hâlâ mahrûse-i Edirne’de iken Çayırkapısı kurbünde sâkin olan Mehmed Ağa b. Abdullah nâm kimesne mahmiye-i Edirne’de meclis-i şer‘-i hatîrde işbu sâhibetü’l-kitâb Sâliha bt. Mustafa nâm hâtun mahzarında ikrâr ve takrîr-i kelâm edip medîne-i Filibe’de ticâret tarîkiyle müsâfir iken fevt olan Ali Çelebi b. Musa zimmetinde cihet-i deyn-i şer‘îden yüz elli bin akçe hakkım olup meblağ-i mezbûr zimmetinde kalmışidi hâlâ mezbûre Sâliha müteveffâ-yı merkūm Ali Çelebi’nin li-üm kız karındaşı ve vârisesi olmağla cümle muhallefâtına vâzı‘atü’l-yed olmağın meblağ-ı mezbûr yüz elli bin akçe hakkımın yüz yirmi bin fıddî râyic fi’l-vakt akçesini mezkûre Sâliha yedinden verâseti hasebiyle alıp kabz edip mâ‘adâsı olan otuz bin akçe da‘vâsından mezbûre Sâliha’nın zimmetini ibrâ-i âm ile ibrâ ve ıskāt eyledim dedikde mukırr-ı merkūmun vech-i muharrer üzere cârî ve sâdır olan ikrârını mezkûre Sâliha vicâhen ve şifâhen tasdîk ve tahkīk etmeğin mâ-vaka‘a bi’t-taleb ketb olundu. Fi’l-yevmi’s-sâmin aşer min-Şevvâli’l-mükerrem li-sene semân ve sittîn ve elf. Şühûdü’l-hâl: Seer [b.] Ca‘fer, Yunus [b.] Mehmed, Mehmed [b.] Ali, Mustafa Efendi b. İsmail, Mahmud Efendi [b.] Ali, Yusuf b. Abdülmennân, Mustafa [b.] Mehmed, Ramazan [b.] Mehmed ve gayruhüm mine’l-hâzırîn.