Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 701 Hüküm no: 760 Orijinal metin no: [116a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Topçu Hasan Beşe’nin haksız yere otuz bin akçesini aldığı iddiasıyla varisleri tarafından İbrahim Efendi b. Mustafa aleyhine açılan davada iki bin akçe üzerine sulh olunduğu Mahmiye-i Edirne mahallâtından Daye Hâtun mahallesinde sâkin iken bundan akdem vefât eden Topçu Hasan Beşe b. Resul nâm kimesnenin verâseti zevce-i metrûkesi Âişe bt. Yusuf ile sulbî kebîr oğlu İbrahim’e ve sulbiye kebîre kızı Ümmühani’ye münhasıra olduğu şer‘an zâhir ve mütehakkık oldukdan sonra mezbûr İbrahim ile mezbûretân Âişe ve Ümmühani mahmiye-i mezbûrede meclis-i şer‘de işbu râfi‘ü’l-kitâb İbrahim Efendi b. Mustafa mahzarında herbiri ikrâr-ı tâm ve takrîr-i kelâm edip mezbûr İbrahim Efendi mûrisimiz müteveffâ-yı mezbûrun hîn-i vefâtında bi-gayri vechin otuz bin akçesini ahz u kabz etmekle biz dahi verâsetimiz hasebiyle meblağ-ı mezbûru merkūm İbrahim Efendi yedinden da‘vâ ve taleb eylediğimizde ol dahi inkâr etmeğin beynimizde münâza‘ât-ı kesîre vâkı‘a olmuşidi el-hâletü hâzihî beynimize muslihûn tavassut edip bizi an-inkâr iki bin akçe üzerine inşâ-i akd-i sulh ettiklerinde biz dahi sulh-ı mezbûru kabûl ve bedel-i sulh olan meblağ-ı mezkûr iki bin akçeyi mezbûr İbrahim Efendi yedinden alıp kabz edip meblağ-ı mezkûr otuz bin akçeye ve müteveffâ-yı mezbûrun muhallefâtına müte‘allik da‘vâdan mezkûr İbrahim Efendi’nin zimmetini ibrâ-i âm ile ibrâ ve ıskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Şevvâli’l-mükerrem li-sene semân ve sittîn ve elf. Şühûdü’l-hâl: İbrahim Efendi el-imâm, el-Hâc Ali b. Hasan, el-Hâc Yusuf b. Abdülmennân, Süleyman [b.] İsmail, Şa‘ban [b.] Mehmed, Ca‘fer [b.] Behlül, İbrahim [b.] Ali, Ali Çelebi ve gayruhüm.