Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 702 Hüküm no: 761 Orijinal metin no: [116a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar nahiyesine bağlı Pınarca köyünden bazı zimmilerin aralarındaki alışveriş hususunda Mehmed b. Abdullah’ın zimmetini ibra ettikleri Mahmiye-i Edirne nevâhîsinden Üsküdar nâhiyesine tâbi‘ Pınarca nâm karye re‘âyâsından Kuzma v. Niko ve İstati v. Pasko ve Miho v. Piyo ve Derandi v. İstasi ve Dimo v. Kiro ve Kiro v. Yuvan ve Dimo v. Duka ve sâir ahâlî-i karye-i mezbûre mahmiye-i mezbûrede meclis-i şer‘de işbu râfi‘ü’l-kitâb Mehmed b. Abdullah nâm kimesne muvâcehesinde herbiri ikrâr-ı tâm ve takrîr-i kelâm edip mezbûr Mehmed ile beynimizde nice ahz u i‘tâ vâki‘ olmuşidi hâlâ hesâb ve kitâb edip mezbûr Mehmed zimmetinde bir akçe ve bir habbe hakkımız zuhûr etmemekle ba‘de’l-yevm mezkûr Mehmed’in hukūk-ı şer‘iyyeye müte‘allik olan da‘vâdan zimmetini ibrâ-i âm ile ibrâ ve ıskāt eyledik dediklerinde mukırrûn-ı mezbûrûnun ikrârlarını mezkûr Mehmed vicâhen ve şifâhen tasdîk ve tahkīk edicek mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvâli’l-mükerrem li-sene semân ve sittîn ve elf. Şühûdü’l-hâl: Ali Çavuş, Ebûbekir Çavuş, Ömer b. Mustafa, Siyavuş b. Abdullah, Mustafa Çavuş, Mehmed b. Mustafa ve gayruhüm.