Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 704 Hüküm no: 766 Orijinal metin no: [117a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ali Çelebi’nin Mehmed b. Abdullah’a olan borcunu kız kardeşi ve varisi Sâliha bt. Mustafa’nın merhumun terekesinden ödediği Mahmiye-i Edirne’de Hasan Paşa mahallesinde sâkine Sâliha bt. Mustafa nâm hâtun mahmiye-i mezbûrede meclis-i şer‘de işbu bâ‘isü’l-kitâb Mehmed b. Abdullah nâm kimesne mahzarında ikrâr ve takrîr-i kelâm edip karındaşım olup bundan akdem vefât eden Ali Çelebi nâm kimesnenin mezbûr Mehmed Ağa’ya zimmetinde edâsı lâzım yüz elli bin akçe deyni olup ben dahi müteveffâ-yı mezbûrun li-ebeveyn kız karındaşı ve vârisesi ve muhallefâtına vâzı‘atü’l-yed olmamla meblağ-ı mezbûr yüz elli bin akçenin seksen bin akçesini yedine def‘ ve teslîm edip ve kırk bin akçesi mukābilesinde tereke-i müteveffâ-yı mezbûrdan mahalle-i mezbûrede vâki‘ bir tarafdan Musa Beşe mülkü ve bir tarafdan Bayram Beşe mülkü ve bir tarafdan merhûm Ahmed Bey veresesi mülkü ve bir tarafdan tarîk-ı âm ile mahdûd iki beyt-i süflîyi ve muhavvatayı müştemil menzil ile mahmiye-i mezbûre kurbünde Helvacı Çeşmesi nâm mevzi‘de lede’l-ahâlî ve’l-cîrân ma‘lûmü’l-hudûd bir kıt‘a bağ ve bir bakraç ve bir tencere ve bir sîm tüylüklü? sırmalı yeniçeri keçesi ve bir ağaç tekne bu cümle eşyâyı alıp kabûl edip mâ‘adâsı olan otuz bin akçe da‘vâsından zimmetimi ibrâ ve ıskāt eyleyip ve benim dahi zikrolunan menzil ve bağ ile zikri mürûr eden eşyâda vechen mine’l-vücûh ve sebeben mine’l-esbâb alâka ve medhalim kalmadı dedikde mukırre-i mezbûrenin vech-i meşrûh üzere cârî ve sâdır olan ikrârını mezbûr Mehmed Ağa vicâhen ve şifâhen tasdîk ve tahkīk etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Şevvâli’l-mükerrem li-sene semân ve sittîn ve elf. Şühûdü’l-hâl: Mustafa [b.] İsmail, Mehmed [b.] Ali, Sefer [b.] Ca‘fer, Yunus [b.] Mehmed, Mehmed [b.] Ali, Mehmed [b.] Mustafa.