Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 705 Hüküm no: 768 Orijinal metin no: [117a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiremitçi Kiro v. Yorgi’nin feshettikleri şirket ortağı Nikola v. Sano ile dört yüz akçe üzerine sulh olduğu Edirne mahallâtından Sitti Hâtun mahallesinde sâkin Kiro v. Yorgi nâm zimmî Edirne’de meclis-i şer‘de Niko[la] v. Sano mahzarında ikrâr ve takrîr-i kelâm edip mezbûr Nikola ile kiremidcilik san‘atında şerîkler olup fesh-i akd-i şirket edip hesâb ve kitâb eylediğimizde mâl-ı şirketden merkūm Nikola ellerinde bin beş yüz akçe hakkım zuhûr etmişidi hâlâ meblağ-ı mezbûru taleb eylediğimde ol dahi inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmağın el-hâletü hâzihî beynimize muslihûn tavassut edip dört yüz akçe üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr dört yüz akçeyi yedinden bi’t-tamâm ve’l-kemâl ahz u kabz eyleyip mâ‘adâ da‘vâsından mezkûr Nikola’nın zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a [bi’t-taleb ketb olundu.] Fi’l-[yevmi]’s-sâlis min-Şevvâli’l-mükerrem li-sene semân ve sittîn ve elf. Şühûdü’l-hâl: Arslan Beşe, Mehmed [b.] Ahmed, İsa Bey, Ali b. Hasan.