Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 707 Hüküm no: 771 Orijinal metin no: [117b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tercüman Yunus mahallesindeki vakıf menzilin oturması için Mehmed Efendi b. Mehmed’e tahsis olunduğu Efendi hazretlerinin imzâsıyladır. Dâru’l-hilâfeti’l-aliyye Kostantıniyye el-mahmiyye mahallâtından Tercümân Yunus mahallesinde vâki‘ olup ashâb-ı hayrâtdan ( ) vakıf ve süknâsını sulehâ-yı ulemâdan bir recüle şart ve ta‘yîn eylediği lede’l-ahâlî ve’l-cîrân ma‘lûmü’l-hudûd büyûtu zevât-ı eşcâr-ı müsmire ve gayr-ı müsmire cüneyneyi müştemil olup Kabakulak Mustafa Ağa binâ eylediği menzile muttasıl ve mülâsık olan menzile tevcîh-i hâkim ile mutasarrıf olup sâbıkā İstanbul kādısı olan Şeyhzâde Mehmed Efendi takdîr-i kadîr-i yezdânî ile vedâ‘-ı âlem-i fâni edip menzil-i mezbûr mahlûl olmağın sulehâ-yı ulemâdan olup meskene eşedd-i ihtiyâc ile muhtâc ve mahall ü müstahık olan işbu bâ‘isü’r-rakīm Mehmed Efendi b. Mehmed’e ber-mûceb-i şart-ı vâkıf menzil-i mezbûr tevcîh olunup tasarrufi’çün işbu vesîka ketb ve yedine def‘ olundu. Fi’l-yevmi’l-âşir min-Şevvâli’l-mükerrem li-sene semân ve sittîn ve elf. Şühûdü’l-hâl: Umdetü’l-müderrisîn Mustafa Efendi b. Abdülhalim, Umdetü kuzâti’l-İslâm Abdullah Efendi eş-şehîr bi-Âşıkzâde, İvaz Ağa ser-muhzırân, Ahmed Çelebi, el-Hâc Piyale, İsa b. ( ).